حياوي صديقي من اهل البصرة الغالية وهو من اصول افريقية (يعني احتمال يكون جده وحشي اللي مرعد الحمزة رضي الله عنه)....فقير وعلى كًد حاله ...لكنه سينما تمشي على قدمين ..صياد ماهر للمفارقة والنكته وحين لا يجد شيء او شخص او موقف مضحك يحشش على نفسه......في زيارتي الاخيرة للبصرة وجدته عن طريق الصدفة واقفا في احد الشوارع البصرية.. سلمت عليه وطلبت منه ان يعيد لي رواية نكته قديمة كان قد رواها لي وهي عبارة عن موقف حقيقي كان قد مر به هو شخصيا....
تحظر لألقاء النكته وكأنه يتهيأ لأداء طقس افريقي في احدى غابات كينيا...صر على شفتيه الغليضتين مع هزة خفيفة برأسه الحليق المجعد....وقال..
والله يا خوية قبل فترة صار عدنا عرس عد واحد من اقاربي....ومرتي لاحتها الغيرة من النجوان(يقصد النسوان) وراحت للصالون ورجعت تلمع(اني كًتله ولك هية جنها تاير منيلها تلمع)..
اسكتني بضحكة مجلجلة ظهرت فيها اسنانه الجميلة ناصعة البياض مع بوكسي بخاصرتي ومعها فشورة زغيرون لا يليق ذكرها هنا او لعل الرقابة تحذفها!!!
المهم....يكًول.... رحت للعرس بس شرطت على مرتي نرجع من وكت لأن طالعة تخبل( وانتو افتهموا الباقي ليش يريد حياوي يرجع من وكت!!!).
بعد ما خلصنا الزفة...رأسا شغلت سيارتي وكًلت لمرتي يالله جيبي الجهال خل نروح لبيتنا وكانت الكهرباء طافية بالبيت اللي بيه العرس...يكًول وهية هم مقصرت جابتلي الجهال نايمين وهم من الاساس طافية عدهم الكهرباء رباني من قدرة الله!!
وصلت للبيت وحظرت نفسي للمعركة(طووووووط) قبل لا تمسح المرة مكياج الصالون وترجع تشبه اخوي هويدي...واذا بطفل من الاطفال يصرخ بكل قوته (واااااااااااااااع)...كلتلهة ولج هذا شبيه روحي سكتيه شربيه مما....
يكًول راحت ورجعت واذا بيها تكًولي من دهر طرك ولك هذا طلع مو ابنا هذا ابن بت عمي احلام وجبته ويا الجهال بالغلط!!!
