قصتنا صارت طربهانه والمواطن من عدنا يحمد الله ويشكره لأن لحد الآن يگدر يتنفس ويسولف وماعاض لسانه , معلوم ياجماعة والأسباب چثيره أولها نسينا قواعد بناء البيوت والمنظومات والعوائل وكل واحد صاير دوله وعلم ومطلّع راسه من الرازونه وگاعد ركبه ونص لاخوه بس يريدله عليه سالفه يفضحه وينتقص منّه ويسويه سالفه بحلوكَ الوادم , هذا يسمّوه شعوبي (يروح فدوه لشعّوبي أبراهيم) تلگيه ذابح روحه على دوله أجنبيه ماتشتريه بنعال عتيكَ وذاك صاير عنصري شوفيني ما تنجرع شوفته يكره أبناء بلده لأن مقشمريه بجوائز يموت وتصير عظامه تراب وأبد مراح يشوفها , و لوتشعل العشرة شمع لهيچ نمايم يتهموك بأنك فد واحد أغم وفاشل , وتاليها صابتنا أم الحبوكر وذبّتنا بهذا الواقع من السطح المايعيشه حشاكم غير القشامر , شجاكم و شجرى ليكم أخرب بيتي عليكم , عمي أكو هوايه حلول وعلى رأي أبو مثنى جوارينا في نظريته الموسومه (كل شي وأله شي) فالعلاج موجود وماكو مشكلة مدام نگدر نبدي من جدّه وجديد والخرايط والموارد والطرق موجوده لكنها مع الأسف مشموره , تعالوا يمعودين خلونا نرجع لتراثنا المعاصر , نتعلم من العائلة العراقية وشلون كانت عايشه وتدبّر أمورها , نشوف العائلة أم العشر نفرات يكون بيها واحد چبير يشرف عليها و يكون صوته مسموع والكل يحترمونه , طبعاً ولابد ويّاه من عائلته أثنين ثلاثه مساعدين وچواديد متكاتفين ونيتهم صافيه , يشتغلون وينصحون ويجيبون مصرف ومايدورون مكسرات ولايسرحون بالتايهات وأم البيت تطبخ وتنظف ويعاونوها بناتها والكل مرتاحه وراضيه حتى الطفل الزعطوط يدزّوه يجيب صمون وقوطية معجون من راس الدربونه وهو فرحان ويهز بمتونه , أما العائلة أم العشرين نفّر الله يساعدها فتحتاج الى دبل مسؤوليات بس الچبير (والچبير الله) يبقى دائماً واحد , تعتاز من أربعة الى سبع چواديد و أم البيت ماتقصّر هيّه وبناتها , وهلم جرّاً على گولة أستاذ خليفه كان خوش معلم بمدرسة القاهرة للتعليم الأساسي عود أقروله الفاتحه , ونرجع للسالفه ولما تكون العائلة حيل چبيره بكبر العراق اللي تعداده ثلاثين مليون وكسر , يصير عدكم الحساب , أكيد هم تحتاج واحد چبير والكُل يحترمونه , و تحتاج طبعاً الى شكم مليون چادود أخو أخيته وياهم نسوان وزلم متحزمه لآذاناتها , كل واحد ينفذ واجبه مو نايم للثنتين الظهر و يگعد يتنعوَص ويريد تتغير أحواله , أكو ناس داخل العائلة مخربين كُلشي وكلاشي أولهم جماعة (العيونهم طايره) وذولي گدامهم فرصتين لو ينضمون للعائلة ويصيرون حبّابين وعقّال ويتوبون لو يرحمونا ويمشون لخوالهم , وثانيهم جوقات (الخنجره بحزامه) فأمامهم أما ترك الخناجر لو تاليهم ياكُلهم الدود والبلاليع والمقالع , يمعودين ييزي عاد لخاطر الله , أنتو بس تكاتفوا وشوفوا النتائج , يصير العراق گمره وربيع وأخذوها من شاربي وأذا بقيتوا نايمين راح تبقى حالنا بيد الجهال أبتداءاً من مزعطة (باقيه وتتمرگص) وأنتهاءاً باللوگيّه من جماعة (أحنا المامش رداد ألنا) قصدي الحراميّه والقفّاصه , وأذا واحد مشتهي يصير (خادم وأله خدّام وأله طربوش من جدّام) فأقول له بكل محبه و صراحه , عمي تره الديمقراطيه مو معناها الكل تصير وزراء ونواب و رؤساء , چا عجل يابا أذا آني صرت نايب وأنت وزير منو حشاكم يسوكَ الحمير , ثمَّ منين يجيبون حمير يابعد خواصري .
ياخوفنا تبقون على نومتكم وتستمر الأحوال الكسيفه الى يوم القيامه , معقولة بلد يمتلك كل المقدرات وماعايزه عوز يروح يدّور على حلول لمشاكله بالخارج , يوميه تعال يا أوباما جيب قواتك وأنت أبو فرنسا أحنا بشاربك , وكيري عايف صويحباته بس يصرف كراوي ويفرر براسه , والوادم داخله أنذار وأبتلت من ورانا , وصايرين طولة حصن , والله شنو , طابلها جريذي ولاعب بيها طوبه , رغم السالفه محلوله وشهودها بيها , بس صيروا گلب على گلب وأبنوا بيتكم و سيّاجكم وچلبوا بهويّاتكم أتحدى واحد يتحرش بيكم , أما الغربه مومشكلة تسوون وياهم علاقة بس لاتخونون أهلكم وناسكم تره محّد يفيدكم أوعدكم أوتوماتيكياً تمشي أموركم ويگعد حظكم وكل العالم يصير وياكم من طوكيو لهانولوو وماگالت.. عمي شوفوا لنفسكم چاره وخلصونا من هاي الطهارة واللي يگول مگال يخسر ديچ هراتي , أودعناكم أغاتي .