داهمتني كسرة جيثوم قبل السحور 
وبعالم الطيف شفت (نيكولاي ميلادينوف) يتصل أبـ(بان كيمون) وفاجئه على غير العادة قائلاً :
داعش تهجّر المسيحيين وكركوك سدوها على النازحين و أهل تلعفر و تكريت وديالى والرمادي وما گالت تارسين المدارس والصحاري والدرابين !
تلعثم بان وكاد يغص بالسوشي وصار عشاه زقنبوت فأجابه على مضض : وهسّه شتريد ؟ 
- أريد فوراً في العراق منطقة خضراء أخرى منزوعة السلاح محظورة التفجير فيها بيوت جاهزة وكهرباء ومي وتستوعب المهجرين , شوف شغلك وأطلب من مجلس الأمن الأنعقاد و أتصل بالناتو و خليهم يشوفون صرفه لهاي الوادم المساكين .
- يمعود من كل عقلك أحنا منطقة خضراء وحده خلت العراق بالعشاء الأخير النوب يصيرن أثنين ؟
- حجّي (بان) نصرك الله على العربان والشبكيين والكلدو آشوريين , تره الأمر حيل خطير وسيكون موقفنا في الأجتماع القادم تحت قبة ماسون .. حيل سخيف 
- حجي (ميلاد) سالفتك صعبة ومحتاجه گلاص چاي زنكين , أحنا أذا سوينا منطقة آمنة لازم يتعاون ويّانا العراقيين , منهو عنده حظ وبخت ونأمّنه على هاي المخاسير , ننطيها للماينطيها , لو للجماعة المتراهنين ياهو يغلب بالريسز الصارله عشر سنين , أخاف حسبالك أحنا مندري باليصير , هذا الوضع حسب نظرية (عبد الحسين شعبان ) يسمونه أبقاء العراق تحت مطرقة الفشل الذريع , يعني القوي ياكل الرچيچ , وهو المطلوب عود أفتهم المقصود..
فزّيت على وقع صينية السحور و وقع نظري على قناة لا تتحدث الا بالسوء
نفسه مستر (ميلاد) يرتدي قاط ورباط ويكاد عطره يندلق من التلفزيون كان يتحدث عن الطنطل والسعلوّه و يصف الوضع في العراق بالهاديء المسيطر عليه , يبدو أنه أصيب بمتلازمة (أم الحبوكر) التي أصابت كل الموجودين ...