والدي زلمة متدين جدا بس من يسمعني ادندن بوحدة من اغاني كريم منصور ينسة روحه ويدندن وياي ومن تفوت وحدة حلوة هم ينسة روحه اخرب بيتي!!
مدمن صلاة في المسجد القريب من بيتنا حته الفجر يصليها هناك على سجادته تحت سدرة مكانها محجوز له دائما ..يرجع وفي جيبه حبتين اوثلاث من ثمر سدرة الجامع ليعطيها الى اول من يلاقيه عائدا من صلاته ويالطعمهن اللذيذ وهن من شجرة مسجدنا ومن يدي والدي...
قبل ايام خرج كعادته ليصلي فريضة الفجر وهو عادة يترك الباب مفتوح كي لا يكلف احد من البيت عناء غلق وفتح الباب بعد رجوعه اذ نكون عادة في ذلك الوقت نتسابق في منافسة ذا فويس عن اجمل شخير!!
وأذا بلص مخسبك شاف الباب مفتوح واستغل الفرصة ليسرق دراجة اخي الكعدة وتمادى اكثر ليدخل المطبخ ليجد جزدان امي فوق الثلاجة وتمادى اكثر حين سرق بطريقه شحاطتي البيجي اللي اشتريتها بستة الاف!!
على الافطار الصباحي كنا كلنا نضحك على حادث السرقة البايخة الا والدي...كان مغموم ولم يزل عنه غمه الا بعد ان استلم راتبه التقاعدي ليشتري البايسكل والشحاطة ويملأ جزدان امي من جديد!!
عند ذاك فقط صار لوالدي المزاج ان يدندن معي ما نشاء!!!
حجي رحمة لجدك وين نلكة مثلك ادمي حته ننتخبه؟؟