في سؤال طرحة احد كبار حاشية السيستاني يقول لماذا السيستاني لا يميز بين الصالح والطالح ولماذا لا يرشح قائمة؟؟

الجواب والذي سوف انقله بالعامية :هناك خمس اسباب لجواب هذا السؤال..

السبب الاول: اذا السيد عين الصالح والطالح مراح ينتخبهم بس جماعة السيد وجماعة السيد هذولة المتدينين الي يتبعون السيد معدودين، قد يحصلون ستين او سبعين مقعد بالبرلمان، لا تبعد ولا تقرب، لا الاكثرية ولا ثلثين، وراح يجي البرلمان ويطلع البرلمان جماعة السيد ما سوولنه شي، وشراح اتكول الناس ؟ حتة جماعة السيد ماسوولنة شيء ماتصيرلنة جارة...

السبب الثاني: جماعة السيد سياسيين وبالتالي ممكن واحد منهم يسد الشارع مالته وعلى بيتة يخلي صبات ومحد يفوت وراح ينسب السيد، او واحد يقطع السير هو وحمايته حتى يفوت وهذا من جماعة السيد وينسب السيد، او واحد من الحماية يدعملة واحد وهم راح ينسب السيد....

السبب الثالث: السيد مو افضل من النبي موسى.. نبي من اولي العزم... ولا عيسى.. ولا النبي (ص).. اما موسى: الله كلة جيب سبعين واحد جاب سبعة الاف غربلهم طلع سبعمئة، نخلهم طلع سبعين، راحوا يم الجبل كالوا ارنى الله جهرة هذولة جماعة موسى.... جماعة عيسى هم راحوا قالوا انزل علينا مائدة.. جماعة النبي بعده ميت ما مدفون راحوا للسقيفة... اذا طلع واحد من جماعة السيد حرامي.. راح يكولون جماعة السيد كلهم حرامية والويل والثبور للسيد شيخلص السيد من المسبات..؟؟

السبب الرابع: فالسيد متعمد ان يجعلكم في المعترك السياسي لكي تكتسبوا الخبرة بأنفسكم ولا ياتي احد متفوق عليكم... يجب ان تعرفوا حيل السياسة والسياسيين وتختارون حتى لو الاختيار خطأ لان الانسان يتعلم من خطاه... انتم في تمرين مع السياسة فرقوا بين الي يزحف والي هسه توه يمشي.. يكوم يوكع وينجبح ويوكع من الدرج سنة الله في الارض انتم تنتقلون اليوم من مجتمع القرية الى مجتمع الدولة..

السبب الخامس والاهم: هذا امتحان مال ابتدائية مرشح صالح ومرشح طالح ونتائجه بالدنيا.. وراكم امتحان اصعب مال متوسطة وإعدادية وبكلورية وكلية الي هو امتحان مال الدين ... اذا متنجح من الابتدائية متنجح بالمتوسطة والكلية... امتحان الابتدائية مرشح صالح وطالح .. من اليوم بدأت الفتن تظهر التي عبر عنها امير المؤمنين تكمن بعضها بعضا يطلع واحد يكول اني ابن المهدي ابن كاطع ايكول اني ابن المهدي لازم تميزون باجر واحد يطلع ايكول اني المهدي ولعلمك راح يجي واحد ايكول اني المهدي اذا انت بامتحان الابتدائية دايخ وخابص روحك لعد بامتحان الكلية شسوي فلازم تجتاز الامتحان حتى خبرتك تتطور.
نقلته بالعامية حتى تتوضح الفكرة