سامعين بالمغسول ؟ الجنوبيون يسمون الشخص اللي يصابون باليأس منه ومن صلاح حاله ، يسموه "مَغَسولْ" . وقريب منها لمن نقول : غسلت أيدي منك . يجوز هذه الكناية تدل على معنى الافتقار التام . 
المهم ، أعتقد أن العراق صار مَغَسولْ . ماكو فايده ، الطبقة السياسية تافهة ، وشريحة المثقفين نايمة عليها الطابوكه . نحن أسطوات في التذمّر والسبّ وتسقيط الآخرين ، ندور الزلات عل بعضنا الآخر، وأحلى شي عدنه لمن نتوهم خطأ معين عند واحد . 
أيباااااااخ ..شلون فرصة تخبل نطلع كل عقدنا ! 
ماكو فايده ..وكل اللي كاعد يصير بينه من ايدينه 
ينراد لنه نقد جذري ، مو أحلام ..وأول من يجب تعريته هو المثقف 
هذا اللي كاعد عل الكيبورد وجكارته بحلكه ويكتب حسباله هو نيتشه وما يدري أي شيء عن شعبه ، ما يعرف شلون تفكر بائعة السمك ، وشلون يفكر ابن العشيرة وشيخها ، ورجل الدين واللي كاعد يلطم والي يزور ، ما يعرف اختلاف مجتمعه عن المجتمعات الأخرى . 
ما يعرف أي شي وداعتكم ..
بس تلكاه استاذ بالتهكم والتحشيش والسخافات التي ما أنزل الله بها من سلطان ..
ينراد نعرف شعبنا شنو هو 
وبعدين خل نحجي بالسياسة 
وآني أول من يخصهم هذا المقال...