أمام وخلف كواليس النت

 

على الفيسبوك :
جميعنا من انصار حقوق المرأة ومساواتها بالرجل ، ومنحها حقوقها كاملة غير منقوصة شاءت ام ابت .
نحب العدل الاجتماعي وندين اعضاء الرئاسات الثلاث منذ عام الفين وثلاثة حتى عام ثلاثة عشر جلالهم ونوريهم واسامتهم .
ناتي الى الدوام الصباحي في الثامنة الا خمس دقائق ونغادر في الرابعة و خمس دقائق کآننا ساعة رولكس السويسرية .
نحفظ و نطبق بالحذافير ونعمم كل الاحاديث الشريفة التي تدعو الى الاخلاق الحميدة والكرم وحب المعرفة واحترام الاخر كأننا من اليابان .
نحفظ تراث العرب من آدم "ع" السلام حين انشد حائيته الخالدة، وصولا الى معلقات عباس چيچان المكتوبة بماء الذهب .
نؤمن بالمطلق باننا منزهون من فايروس الطائفية الذي جلبته الذبابة الاميركية لغيرنا عندما كان الوزير الصحاف يلقي خطاب العلوج الشهير .
لا يطبق لنا جفن حتى نطمئن الى ان جارنا في الضفة الاخرى غطى آخر ابنائه وناموا نومة سعيدة مثل الافلام الهندية بطولة المرحومين شاشي كاپور و راجندر كومار .
لا تمتد يدنا الى طعام حتى نتاكد من ان جارنا الشمالي الحبيب بات شبعانا مكسوا ومعافى .
نحفظ ثلاثة ارباع القرآن الكريم و ثلثا شعر طاغور ونصف شعر الخيام و ربع انتاج الوجيه ابن سيد عباس .
متخرجون في كليتي الهندسة والطب معا ، فان تواضعنا فخريجو معهد التكنلوجيا.
جميعنا تمتد عروقه الحضارية الى عمق ٧ آلاف سنة ضوئية و يشمئز من العادات والتقاليد العشائرية البالية ، و يصاب بغثيان سارتر عندما يسمع بالتخلف والمتخلفين .
جميعنا يلعن الغرب الكافر الظالم المحتل والمختل.
جميعنا علاقاته العائلية داخل بيته سمن على عسل ، فلا تتطاير نعلان من الحيطان نهارا ولا تتقافز الصحون الطائرة من الشبابيك ليلا .
جميعنا كان ثائرا في منطقة الاهوار ويشهد له بالسجن في نقرة السلمان مظفر النواب وعريان سيد خلف .
.........
في البيت :
هو : شوفي !! تره بعد حچايه وحده منچ اسمط ابو ابوچ بدفرة وحدة ما اثنيهه والعباس ابو فاضل اللي ما احلف بي چذب ، تره آني مو ناقصچج ... هي : ولك عندك عين وتهددني ؟ نسيت الجودلية اللي گاعد عليهه جابتهه الك آمی ... صدگ انته فد واحد ما تستحي ... وبقية الحوار واضحة
في الدائرة :
هو : خوية والله العظيم هاذه بلد ما يمشي الا بالكفخات . هي : اي ولله عاش حلگك. بس صدام چان يمشيهم مثل كردوس الجيش ... عمّي يا ديموغرافية يا بطيخ "تقصد ديموقراطية طبعا" . 
هما معا ... صارت الساعة ثنعش هم يالله نوصل للبيت . ملينه من الشغل. يلله چاو .
في الشارع : لا تخليني اكفر بالسمه هسه ... تره گلبي مليان وروحي طافرة . لا تحچي لي بالقيم والمبادىء ، تره و الحمزة ابو حزامين اسوگك بعجل اشمرك بحضن جيش النصرة ... مو عبالك تلغي براسي محاضرة اخلاقية ... افتهمت ؟ 
في الكوفي نت :
دخليك حمودي انته سامع بواحد اسمه دعبول ؟ يگولون يسوي شعر كلش حلو عن اهل البيت ... اريد اسويلي شكم پوست مال توصا وادزهن لاصدقائي حته يتثغفون شوي . كافي جهل عاد
في المحل :
سمعت هليوم عن انفجار اربيل ؟ يمكن علگت عدهم ... بلچي الله شوي تخف عنّه ... تره استلگ ابو ابونه ، مو سبونه سبي بهل مفخخات والكواتم ... ييزي عاد ييزي ... 
وهكذا في ملعب الشعب وعلى مقاعد الدراسة وفي سوگ مريدي وگازينو ام كلثوم ووارن ستريت في ديربورن مشيغن وسياتل واشنطن وقم و اونتاريو وويلينغتون ودرسدن . كوبي پيست ، وأبوك الله يرحمه .