| قصيدة زجلية عامية بعنوان : مواقف !.. محمد حلمي مصطفى |
حاجات تغيظ .. حاجات تضايق حاجات تدوخ عقل الفايق عـ اللى بيحصل أنا مش طايق مـ اللى بيحصل أنا مذهول =-=-=-=-=-=-=-=-=-= تلاقى أخ بيقتل أخوه تلاقى إبن بيدبح أبوه وقلب يصرخ يا ناس يا هوه عـ اللى بيجرى مين مسئول =-=-=-=-=-=-=-=-=-= هوانا بقى كله مآسى زمانا بقى دايما قاسى أشيله على عينى وراسى ألاقى قسوة قلبه تطول =-=-=-=-=-=-=-= زمان ده كان مية المية اللقمة فيه تكفى المية نسينا ليه الحنية ولسانا بقى بالكدب يقول =-=-=-=-=-=-=-=-= وفـ الشوارع تشوف مواقف تخلى شعرك يا عينى واقف وعـ الرصيف قاعد وواقف عاطلين وبالهم مش مشغول =-=-=-=-=-=-=-=-=-= خلاص يا ناس أنا قلبى خلاص يتمنى يملا الحب الناس ونعيش فـ دنيا من الإخلاص وكل صاحب حلم ينول =-=-=-=-=-=-=-= يا رب إدعوا يفوز الدين يا رب إدعوا وقولوا آمين الفكر يرجع تانى رزين ولا يغوناش هوى العقول =-=-=-=-=-=-=-=-= بقلم : محمد حلمى مصطفى الأسكندرية – جمهورية مصر العربية |
