مرات افكر و اصفن بموضوع "من المسؤول عن الحالة الراهنة في العراق"؟

- اذا استنادا لمنظور الوعي العام الحالي عقلي رح يكول : الحكومة هي المسؤولة، الدول الاقليمية هي المسؤولة، الفساد داخل الحكومة، الخ . 
- اذا استند لمنظور الوعي الديني : عقلي رح يكول : لا، الشغلة شلغة دين، وهجمة على الاسلام، و صراع بين المذاهب لحيازة السلطة، فالصراع يؤدي الى فوضى وارتباك بالداخل، وبهذا تبقى الاوضاع غير مستقرة.
- اذا استند لمنظور الوعي الاقتصادي العام : عقلي رح يكول: لا الدين شعليه، هي مصالح اقتصادية وصراع من اجل الثروات والمكاسب لكل الفئات بالعراق وكل الطوائف، مو حتى الدين استغلوه لخاطر المصالح الذاتية.
- اذا استند لمنظور وعي المؤامرة : عقلي رح يكول : عمي ترى الشغلة كلها شغلة مخطط قديم لتقسيم المنطقة وتخريب الدين و تدمير الشرق الاوسط و العراق باعتباره رأس وجمجمة العرب فبدأوا بيه، وشغلة اسرائيل والفرات و النيل، وتعال شيخلصنا من هاي.
- و اذا استند لمنظور وعي الحكومة : عقلي رح يكول يابه ترى الشعب على الرضا ميرضون ، شتجيبلهم ميرضون، وميفتهمون بالسياسة، وانه اكو مصالح وسياسة عليا، وانه السياسة داخل اروقة الحكومة مو مثل ميحسبها المواطن، وضغوطات خارجية وداخلية على الحكومة، وصراعات ميفتهمها الشارع.
- واذا استند لمنظور وعي المخابيل: يكلك يمعود انت شدتسوي وشعليك لتفكر وخليها هي تصفى .

بالاخير ارجع لنفسي واكول : على سبيل المثال عطلة باجر " 1 محرم" 
منو الي رح يحتفل بيها؟ الجواب : الشعب.
زين : عطلة 10 محرم، منو يحتفل بيها؟ الشعب طبعا.
زين : عطلة رأس السنة منو يحتفل بيها؟ الشعب طبعا.
زين عطلة نص السنة الدراسية و النهائية : منو يحتفل بيها؟ الشعب طبعا.
زين عطلة 12 ربيع الاول : منو يحتفل بيها؟ هم الشعب.
وهذه العطل البقية منو يحتفل بيها؟
1 كانون الثاني 
6 كانون الثاني 
21 آذار 
1 أيار 
14 تموز
1 شوال 
10 ذو الحجة
الشعب ايضا.
وفوكاها عطلة الجمعة و السبت من كل اسبوع الي تساوي 96 يوم، يعني 3 اشهر وشوية.

واكو عطل ما ادري مالت شنو، مرة عيد الدجاجة الي تبيض العصر، وعيد الشجرة وعيد البقرة وعيد البطة وعيد القطة وعيد الوردة وعيد الام وعيد الاب وعيد الابن و عيد الجد وعيد المعلم وعيد المعلمة وعيد الجامعة وعيد الاستاذ وعيد البرلمان وعيد اللبن وعيد القيمر وعيد السكر وعيد الملح وعيد البعوض وعيد الصعود وعيد النزول وعيد المشي وعيد الركض وعيد النوم وعيد الصحوة وعيد المادري شنو.

المهم لهنا ووكف عقلي عن التفكير، بلكت انتو تحلوها، لان اريد اعرف منو المسؤول عن الي ديصير بالبلد هسه؟