كلشي مضكور بالكتب وسالفة حكيم شاكر .. هواي مضكورة .. يعني كلمة حكيم ماكو يوم مر على المعمورة !! وما انضكرت .. يمكن عكس المعمورة هي المهجومة هاي التسولف عنها جدتي .. ماعلينا بالودام .. يكولون كَبل الشعر عند أغراض مو مثل هسة السالفة تايهة !! وجانت الحكمة من أهم اغراض الشعر .. والعرب يموتون على ابو المثل .. يعني نفسه هو ابو الحكمة !! بس العرب عدهم سوالف ماينلبس عليها (عكَال ) بس لا افتهمتوني صح !! مثلا يسمون الملدوغ سليم والاعمى بصير .. واللي عمره ماسجل هدف بالشوط الثاني (حكيم ) وسالفة حكيم سالفة طويلة لأن دائما يوصلنا (للكاس) ويرجعنا عطشانين .. الى أن اتفق وي واحد من بيت حمود !! بس مو عبد حمود لأن يكولون هذا ناجح بس بيش ناجح ماندري !! وراح وكت واجه وكت .. والمنتخب العراقي اصبح من مجرد خبر دائما يسبقه فعل (خسر.. المنتخب العراقي ..) بس اني كلما اعترض !! الوادم تعترض عليّ ويكولون : انت شعليك مادام أحمد راضي !! بوية عساه لارضى جاهي بكيف احمد ؟؟ لو المنتخب مال قائمة التوافق مثلا ؟؟ يعترضون النوب وينطونها (بُعد قومي ) ويكولون حتى (حسين ) سعيد !! اشتعل ابو السعادة ولكم ياسعادة واحنه كل خمس دقايق نتعرف على كَولجي نص عمر !! 
هسة يجي واحد ويكول : نصير شمه !! ويسويلنه طلابة !!.. والاحسن .. اسأل مدرب ولاتسأل حكيم .
ملاحظة : أنا منذ (نشأة) أكرم حتى الان لم اشاهد اية مبارة !!