اخطر شي بالمضكورات هي الامانة .. لأن الاديان السماوية وحتى الارضية مركزة عليها .. ورب العالمين يأمر الناس بان يردوا الامانات الى اهلها .. وهذا معناه ان امانة بغداد مو مال الامين ولا مال صاحبنا اللي ردت اتداين منه خمسين الف وكال بس خابرلي جماعتك يسووني مدير قسم وتدلل !! خوية شلون اتدلل؟ يجاوبني ويكَلي : وعد مكتوب !! (لا هاي اغنية ماعليها بالسالفة ) يكول : اذا صرت مدير راح ازور الاجور اليومية واخلي رواتبهم بجيبي وراح اطبكَـ على كل ابو بسطية واخذ منه يوميتي .. والشغلة باسبوعين اشتري بيت وسيارة .. ماعلينا لا بصاحبنا ولا بالوادم .. السالفة يم المتنبي .. يكول : والهجر أقتل لي مما أراقبه ... أنا الغريق فما خوفي من البلل!! والوادم ترجمتها للهجة العراقية وكالت : المبلل مايخاف من المطر .. وبقت الامانة عد الوادم ومارجعوها لاهلها مثل ما أمرهم رب العالمين .. ويومية صاير امين جديد !! يابة : مو اهلها موجودين .. اخذوا رايهم !! شوفولكم حل !! شنهي الامانة شغلها بس صبغ ارصفة مثلا !! واذا مطرت الدنيا يطيح الصبغ !! بس لاتفتهموني صح !! السالفة مو يمكم عمي بوية والعباس ملينا كولة (ام عامر ) مايصير هيجي !! يعني دائرة واذاعة وتلفزيون وسيارات كل هاي والدرابين اللي بصف الخضراء يعني بصف القرار الحكومي .. بوية بالكرادة بالضبط بس مو بالشارع العام لا باي دربونة .. ترى الماي لحد الان مال المطرة السابقة .. ها؟؟ شفتوووو ؟ بالكرادة مو بالثورة !! ولا بحي آور ولا بالشعب .. صدك على ضكر الشعب !! جا انتم لا تقبلون تردون الامانة للشعب وفوكَاها تحاسبون الشعب اذا طلع تظاهرة على امانة بغداد بسبب البحيرات التي تركتها المطرة السابقة في حي اور وعدم صيانتكم الامانة !! خو ماكوشي .. ؟؟ انوب الامانة كَاموا يلبسون قوط .. وخلو البدلة مال العمل للمحافظ !! جا خووووووش !!