علموني أهلي..
أحب الناس وزرع بالدرب خير وبشاير 
وعلموني... الماتحبه الناس عمره يعيش خاسر
وكال أبوي.. بصوت واضح:
لاتعاشر ربع تربطهم مصالح...
لان عشرتهم فقاعة وتنتهي من عين باجر
علموني الشرف قبله وجف دعاء ..
وعفت بنيه كظتها أبيت طاهر
و أمي كالت... يمه جاراتك خواتك
خلي عينك باردة وبالزينه حاضر
وكالو : ألدنيه قطار ...
وابمحطاته يدور.. ونته بيه راكب مسافر
ايه ياجرحي المكابر...
شكد خطيه الناس ........ جانت فقره كلش
على ألفطره أتعيش..
بس عدهم كرامه وبكلبهم كلشي عامر
وهسه ..لا مومثل الاول
كلشي بالوادم تبدل 
ناس لبست وجه ثاني... وناس بالباطل تجاهر
وعلموني الغيره كطره
وحاجه بس اشكد عزيزه بعوز شاعر
وعلموني امشي ابسجج.. بس بيها فقره
لان ماعدهم مصالح بالحياة..
الضحكة عدهم تنعجن وسط (الجنابر)
وياجنابرهم إمام وبيها شاره 
لان سترت كل يتامى الكون..
... والمسكين عايش بيها حاير
يامراجعنه السياسية .. ويصناع القرار
ليش مشكلة الفقير اعيونها اتعاين الباجر؟
وندري باجر... راح يتحول رصيف
وريش ووسادة فقير وبيته صاير
ونتوا عيشتكم دفوا ..وجنه ونعيم..
وصيفكم جله وجحيل...
وليلكم غفوة وخدر..
واببيوتكم حراسكم داير مداير
سدوا كل بيبانكم .. نكدر نعيش..
بس كفر بوجوهنا أتسدون بيبان الضماير