بالعراق كلشي غامض..ومتعرف شلون يشتغل هذا البلد..ومنو اللي أيديره.. حرب على الارهاب بالرمادي والفلوجه..وهناك..كالو داعش أنسحبت..وسيطروا العشائر والثوار على قضاء الفلوجه وما كو داعي لدخول الجيش العراقي..عجيب..شنو هذا فلم هندي لو مسلسل تركي..كبل يومين جانت الدولة الاسلامية في العراق والشام هيه اللي مسيطرة على الفلوجه بالكامل..ومن وره هذا الشي..نزحت العوائل الى قرى مجاورة والى كربلاء خوفا من تعرضها للقصف العشوائي للجيش العراقي.. وهم على غفله.. داعش تطلع من القضاء وتسيطر( العشائر اللي جانت معتصمه على مدى أكثر من سنه )على المدينه وبالتعاون مع الشرطه المحليه..زين وين راح ال150 داعشي من هاي المدينه وهم وين طلعو وبأي أتجاه.. شنو هيه غان جغان لو فلتانه الشغله.. يعني مثل صفقات الاسلحه وتمشي.. لو مثل عبد الفلاح السوداني وأخذ الدخل وعلك بلندن ..صدك جذب ..هيه هاي دوله ..تحسون يا جماعه أكو فد متريد حكومتنه الرشيده نعرفه.. أكو شي يمس الامن الوطني للعراق وملازم توضحها حكومتنه العتيدة ..زين ..البارحه جان أبو ريشه ومحمد خميس من القاعده .. اليوم صار أبو ريشه بطل وطني وقائد الصحوات وأيدافع عن الرمادي والفلوجه..ومثل ما جان مشعان الجبوري حرامي وطائفي وتحول بقدرة أبو سراوي الى عضو جديد في دولة القانون.

واليوم طرح عمار الحكيم هم طاوله بس مو مستديره..قشمره أعمار لاهالي الانبار بأربعة مليارات دولار..يا حي..وأنشاء قوات دفاع مدني تتولى حماية الحدود والطرق الدولية..هذا هم ميثاق شرف لو أشخط  بالحايط .. يمعودين كافي ضحك على ذقون الشعب..لا الشعب بعد عنده ثقه بحكومته ولا الحكومه عدها ثقه بالسياسيين اللي دمرو هذا البلد..هاي عبرنه العشر سنين.. شنو اللي قدمته حكومة نوري المالكي لهذا الشعب.. الجنوب مصخم ومشعول أبا عن جد..ويمصون بيه وهو مثل البعير اللي محمل ذهب وياكل عاكول..ومن يطلب خمسه بالميه من نفطه.. تقوم قيامة حسين الشمرالثاني..عبالك من جيب اللي خلفوه..لا كهرباء بيها خير ولا ماي ينشرب.. ولا شوارع تفرح الناظر..وهذوله شيعه يا خلك الله..والله لو تشوفون السماوه والناصريه والله تبجون على حال الناس اللي ما أدري شلون عايشه.. ومن بابها.. نسبة الفقر قلت بالعراق.. لعنة الله على بوش واللي جاب بوش..

  جان المفروض يا أبو سراوي كبل ثمن سنوات تسوي مصالحه ومصالحه حقيقية بين أبناء الشعب العراقي , مو كعدت بالمنطقة الخضراء وتعتمد على أجكم مثل عامر الخزاعي بس أيجذب عليك ويصرف فلوس الشعب على الحفلات..جان أنت تروح تشوف شعبنا بالبصره والناصريه والرمادي وديالى والموصل وتسأل الناس شلون عايشه وترسم قرارات تفيد هذا الشعب..بس شيفيد..خلصت يا أبو سراوي..وما خفي كان أعظم