خير اللهم أجعله خير.. أيكولون المنام لا تحجيه ألا بالمرحاض, حتى أيروح شره .. بس حلمي بالمالكي, ما خليت واحد ما سولفتله .. أريده يتحقق وبسرعه .. خير اللهم أجعله خير .. وبعدني ما حاجي الحلم , وصلني خبر , خير اللهم أجعله خير ,أنو أبو سراوي , دش للعنايه المركزه بمستشفى أبن سينا .. لان السيد ريس الوزراء والقايد العام للقوات المسلحه وزيرا الدفاع والداخليه والمشرف على جهاز المخابرات الوطني , والمسؤول العام على القضاء العراقي , وريس هيئة المساءله والعداله , تعرض للاجهاد والضغط .. أي أدري منين يلكاها .. أشو كلها سوده مصخمه .. ومنين ما أيدير وجهه أيشوف هوسه , وكلها محضره شلون سجاجين بعد شيبي , بس أيريدوه يوكع .. وجيبه جيبه وين التوجعه.. وخير اللهم أجعله خير , هذا الاجهاد والتشنجات ,صارت من وره التقارير الجذابه اللي يكتبها ويوصلها سسينه وقيادتنه العسكريه الحكيمه , على الرمادي والفلوجه .. ومثل ما تعرفون أن سسينه مو مثل ذاك السسي .. لان سسينه أثنين سسي .. هم هو سسي الثقافه وهم سسي الدفاع .. بينما ذاك سسيهم سسي واحد .. لذلك سسينه مو بكد سسيهم .. سسينه ضليع بغزوات المدن, وأكل الدليميه..

خلونه نكمل السالفه .. سسينه كام أيطلع ( صور من المعركه ) بس على قناة العراقيه طبعا .. حتى يثبت للمالكي أن جيشه حقق أنتصارات رائعه على العدو الصهيوني .. وسمعتو الاناشيد الوطنيه وهي تلهب الشارع العراقي بالنصر المبين على الطغاة .. بس سسينه ما خبر المالكي عن الخسائر بالجنود الابرياء ولا بالمعدات العسكريه .. وما كال تره عيوني أبو أسراء , جنودنه الابطال كامو يتسربون واحد وره الثاني .. والوضع كلش صعب , لا , خلاها سكته سسينه.. وراح دز خبر للمالكي , بأن الحرب حسمت لصالح الدوله .. وخطيه أبو سراوي ميعرف شنو السالفه .. وجان يمه واكف المستشار علي الموسوي وهذا هو سبب خسارة المسلمين في معركة أحد.. يشتغل بالابيض والاسود .. كوم ودز للعراقيه , خبر عاجل .. الحرب حسمت لصالح الدوله .. بعوره وطايحين حظ .. بس باللغف أيفتحون عيونهم ..

ويوميه نقره بتايتل العراقيه , وهاي عبرنه الشهر على معركتنه المفتوحه , جيش سوادي كتل أربعين داعشي وبيناتهم والي جبير,وفرضنه السيطره على مناطق واسعه من الرمادي , وألقينه القبض على المسؤول الباكستاني , وبقى بس عشرين بالميه بعد ما طهروها .. وسسينه ما يدري كل الشعب العراقي مطهر من كاعه .. ولو تحسبون شكد وصل عدد قتلى داعش لحد اليوم , راح تنصدمون صدمه خايبه .. أكثر من ألفين داعشي ..وسبعه معسكرات.. ذوله شلون دشو للعراق .. وشلون بنو هاي المعسكرات وشلون دششو دبابات وأسلحه ثقيله .. دبابات وأسلحه ثقيله يا لواء عدنان الاسدي ويا سسي .. صح النوم..

على سسينه أن يكون صريحا وأهل بالثقة , ليعطي نتائج المعارك بكل أمانه ..وأن يضع الشعب العراقي بالصورة ,ليتحدث عن خسائر جنودنا , التي تحتفظ بها ثلاجات مدينة الطب مع أعداد الجرحى, وأعداد أسرانا لدى داعش وحدها .. وما خفي كان أعظم