في محاولة لجس نبض الشارع العراقي البغدادي حول الانتخابات البرلمانية القادمة في العراق وحالة التشتت التي يعاني منها المواطن العراقي الكادح والبسيط عملت على تجميع نماذج عشوائية من آراء المواطن البغدادي حول الانتخابات القادمة ومن سيفوز بها ومدى نزاهتها، وتجمعت تلك الآراء والمواقف من خلال الاستماع الى نقاش او وجهات نظر لعدد من الاشخاص في الشارع او المقهى او الباص العمومي ... الخ، دون ان اكون طرفا بالموضوع ، او من خلال توجيه سؤال لشخص ما بشكل عفوي وسريع وبدون مقدمات، عسى ان يساعد هذا النبض والهاجس في فهم وتحليل الوضع السياسي في العراق وموقف المواطن العراقي منه، بعد ان عجزت ارقى الاستطلاعات والاستبيانات في جس نبض المواطن العراقي وبناء استنتاجات سليمة عليها، حتى الاجوبة الساخرة والقادحة وغير الجادة فهي بالتأكيد مؤشر لموقف ما، اليكم تلك المواقف كما هي وكما جاءت على لسان اصحابها وحتى باللهجة العامية حفاظا على معناها والمراد بها :
* عمي لا انتخابات ولا هم يحزنون قائمة النواب جاهزة عند الامريكان 
* المالكي ما ينطيهه بسهولة
* ما اشارك في الانتخابات وياريت تلكالي احد يشتري بطاقتي بيش ما جان 
*أرغب في انتخاب المرشح الاول لجماعتنة ( الحزب الشيوعي العراقي ) ولكن جاسم الحلفي يحمل الجنسية المزدوجة العراقية والسويدية وسوف انتخب القائمة فقط 
* كلهم حرامية وعف ... لذلك لا انتخب اي واحد منهم 
* أنتخب المالكي لأنه شين التعرفة احسن من زين الما تعرفة
* الله كريم بيوم الانتخاب اشوف منو انتخب
* لا انتخابات ولا بطيخ همة نفسهم باقين صب بيهة جب بيهة
* راح انتخب حسنة ملص لأنها أشرفهم 
* أنتخب التحالف الديمقراطي بلكي الله يخلصنة من أهل العمايم واللحي
* وداعتك يعمي جذب بجذب السالفة سالفة فلوس وخمط وبوك
* أنتخب د. صباح عبد الرسول التميمي لأنه أحلة وحدة بالنسوان / حظنة ما كعد وية الزلم بلكي تكعدة النسوان
* المواطن الذي يحترم نفسه يقاطع الانتخابات وهذا افضل موقف ضمن تلك الفوضى وارقى رسالة يمكن ايصالها للعالم
* والله يرادلنة سيسي عراقي حتى يخلصنة من إخوانجية العراق
* المالكي فايز فايز لأنه الحرس والشرطة كلهة إلة جا هو غشيم من زيدهم 500 الف
* أحسن كلشي أنتخب إبن عشيرتي د .عبد جاسم الساعدي بلكي إذا فاز يعيني
* هو إحنة مال ديمقراطية وانتخابات يرادلنة واحد مثل صدام بس شوية عادل
* متصير انتخابات واذا صارت ازين شاربي
* المالكي باقي واذا حس بيهة لاصت علية يلغي الانتخابات ويعلن احكام عرفية
* أنتخب الشيوعيين لأنه ما كو احسن منهم 
* أكيد انتخب الأحرار لأنه آني صدري
* أشوفلي سيد معمم وأذبهة بركبتة
* أنتخب خيال الجواهري انتصارا للمرأة العراقية واكراما للجواهري الكبير
* انت معليك المن أنتخب واحترم نفسك
* أسأل عمي وهو يكلي المن انتخب لأنه يفتهم بالسياسة
* ما أدري أنتخب لأنه حيرة ولا صوهة علينة
* أنتخب الشاعر مروان عادل لأنه صديقي وشاب متنور ويصلح ان يكون وزير ثقافة
* لو كنت بالعمارة انتخب علي دواي بس في بغدار الاختيار مشكلة
* أنتخب ابن عمي رحيم الفريجي
* أنتخب د. مهدي الحافظ لأنه اكاديمي وليبرالي معتدل
* والله ما أدري المن انتخب اذا عدك أحد يستاهل وثقة أنتخبة
* أنتخب ابو سريوة لأنه كدهة وكدود ( المقصود المالكي / ابو إسراء )
* أنتخب جماعة حليب النيدو هلبت يرخصون أسعار الحليب ( في اشارة الى إئتلاف المواطن وشعارهم المسروق من علبة حليب النيدو المشهور )
* أنتخب د. مالك المالكي لأنه عميد معهدنا وشغلتنة يمة