نعم كيا العلوم السياسية وليست كلية .. فسيارة الكيا تحمل بداخلها يوميا عشرات ومئات المحللين السياسيين العراقيين ..
واليوم تحديدا ً رأيت ما يقارب (8) محللين قد وضعوا النقاط على الحروف حسب وجهة نظرهم وربما يكون الحل فيما طرحوه هم !
كلهم اجمعوا على ان السبب هو في شخص المالكي سواي وشخص آخر أوضحنا بأن السبب هو في السياسة المرسومة من قبل جميع الاحزاب السياسية الحاكمة !
لكن مما اثار استغرابي هو الانهاك والاستسلام الذي يعاني منه المواطن فمن جملة ما استوجبوا حصوله هو الحوار .. ومع من ؟
مع البعث .. ومع الارهاب !! 
أحدهم قال " الأيد الما تكَدر تلويهه .. بوسهه " اشارة لأزمة الانبار وداعش !!
وآخر قال " عمي الشعب جايف وجبان .. شفت المصريين شسوو ؟ طبنه مرض وين ما تصفه خل تصفه "
لكن الغريب في الموضوع هو تحشيش سائق الكيا .. الذي قال :
" والعباس هسه انتم كلكم تحجون عالمالكي وبس تجي الانتخابات كلكم تنتخبونه دبطلوا عاد "
وطبعا ً اني ما حجيت بس شكم حجاية كَلتلهم المشكلة كلهه مشتركة بيهه, وما اعتقد راح يجي واحد يغير السياسية المعمول بيهه اليوم .. ينرادلنه تغيير سياسة مو تغيير وجوه !
لكن سرعان ما هجم (ابو التشيرت النيلي) وصاح
" هاا هم هاي راح تحورونهه .. المرجعية كَالت غيروا الوجوه منين جبتوا هاي اللوفة .. والله شعب ما تصيرله كل جارة "
(انه اتخطيت على كَولة عادل امام .. وسكتت) وبقى ابو التشيرت الأحمر يدافع عن وجهة نظرة بشراسة .. والسايق يحشش وميت من الضحك !!
ومن وصلنه لنهاية الدرب .. كلهه نزلت من كية العلوم السياسية وكل الجانوا مشتركين بالنقاش نزلوا وعلامات النصر على محياهم , خصوصا ابو الاحمر الجان كَاعد وراي !
( معليكم بهذا الحجي كله بس الله عليكم شلونهه مال محياهم ؟)