جماعة (بوكو حرام) النيجرية وأسمها يعني (التعليم الغربي حرام) واحدة من الجماعات الإسلامية المتشددة وشغلتهم كلها خطف وقتل وسحل وذبح ونحر .. يعني ماعدهم سالفة بيها خير غير بس الدم .. لكن بالأيام الأخيرة صعد سوكَهم لأنه خطفوا 200 تلميذة من إحدى المدارس .. وكَالوا راح أنبيعهن جواري للميسورين .. العالم والاتحاد الأوربي وكاثرين اشتون ومنظمة هيومن رايتس ووتش وباقي المسميات صعدت عدهم الغيرة للستار.. حتى الرئيس الفرنسي هولان حلف..وكَال بشرف صديقتي فاليرى تريرفيلر إلا أفض السالفة وأشوف حماها من رجلها ..!!
طبعاً نحن ضد الخطف . بس العالم المنافق والدجال صار عشر سنوات خانس وساكت على جماعة (بوكو حرام العراقية) والمتمثلة بالرئاسات الثلاث في العراق ومن معهم من التوابع والمليشيات والمسلحين المتنوعين . لانه ماكو فرق ابداً .. هناك خطف وقتل .. وهنا خراب وقتل وخطف وجوع ودمار ونهب وضحك على وطن وشعب بأكمله ..!! وهناك بحجة الإسلام يفعلون كل السيئات .. وفي العراق نفس الحال الأحزاب المتأسلمة .. بس الاختلاف بين جماعة نيجريا والعراق هو الملابس.. هناك لبسهم كله (شلح وعبر) وبالعراق قوط وأربطة وسيارات حديثة ولقاءات تلفزيونية وعناوين سياسية..!!
العالم والمنظمات والهيئات الدولية والرسمية والغير رسمية .. ترى ما خايفين على التلميذات المخطوفات بقدر خوفهم على مصالحهم ونفوسهم المريضة ..ومتى ما شعروا بأن مصالحهم في خطر بأي مكان .. أشتغلت عدهم (قوانة الغيرة والضمير).. لأنه في العراق كل يوم القتل شغال 24 ساعة . مع فارق بسيط في يوم الانتخابات وبعدها بكم يوم اكو هدوء لان جماعة (بوكو حرام العراقية ) مشغولين هالايام بالعد والفرز وترتيب الأمور وبعدها تشتغل رحمه الله والطاكَـ والطيكَـ..!! واحلى شيء الغيرة والضمير والأحساس العالمي خارج نطاق الخدمة ..!!
اوف يا كَلبي .. مال اجمع كل الحرامية والفاسدين بالعراق وياهم مدحت المحمود والمفوضية الغير مستقلة وانطيهم (عطية ما من وراها جزية) الجماعة بوكو حرام النيجيرية واخليهم ايبيعوهم مثل العبيد للميسورين.. والله يفرجها على العراقيين ونروح نشتريهم حتى نطلع كل الضيم والقهر بيهم الهتلية والطراكَات.. بس أرجع واكَول هاي نتيجة كل مكان وزمان يكون فيه للحفاة والأغبياء وجود والطامة الكبرى أيصرون قادة البلاد ..!!
سلامات يا عراق .. اخ منك يالساني