الشعب يريد نوري المالكي , أي نعم هذي أرادة شعب ؟ وأذا أحد يشكك بهذا الموضوع أكيد حاسبهة غلط , شلون ما شلون الناس انتخبت نوري المالكي وائتلاف دولة القانون وبكل المحافظات , وحتى أجي وي المشككين بنزاهة الأنتخابات , وادعاءات التزوير وراح نسقط من الخمسة وتسعين مقعد فد عشرين مقعد هم الناتج سبعين والسبعين هم تعني أبو أسراء فايز , الناس عدهة وجهة نظر بالموضوع , ولازم نرضخ لوجهة نظر الناس , ويكفي تشكيك بنتائج الانتخابات وخلونة نروح لمفاوضات تشكيل الحكومة رجاءاً , يعني كل الكيانات أو أغلبهة الي شاركت بالانتخابات عدهة ممثلين بمفوضية الانتخابات الغير مستقلة , ومن اكول غير مستقلة هي فعلاً غير مستقلة لأن من تشكلت و صادق عليها مجلس النواب هي رضخت الى المحاصصة والتقسيم الحزبي , من مجلس المفوضين الى أصغر عضو بالمفوضية فوين الاستقلالية بالموضوع , واحتمال يقصدون بالمستقلة على تخصيصها المالي كلشي يصير !!  فمو من حق اي كيان او تحالف يشكك بنزاهة الانتخابات وهو عندة عضو بمجلس المفوضين نهائياً , ولا تكلولي ضغط الأنسان الي يشوف الشي الغلط لازم ميسكت لو مو ضغط وتهديد وترهيب شو ما شفنة واحد من المفوضين شك زيجة بمؤتمر اعلان النتائج وصاح تزوير , يعني خمو صعبة , ولا واحد من الموظفين الصغار حجة , فرجاءاً بدون تشكيك ولا تضيعون علينة وقت ضايع أصلاً , وخلونة نلتفت لمفاوضات تشكيل الحكومة بساع , ونحاول قدر الامكان أن نحصل على تشكيلة حكومية أحسن من التشكيلة السابقة , الي لازم السيد نوري المالكي يكون عضو بارز وهام بيهة وفق معطيات النتائج الاخيرة , وما نريد شي مضموم , وعلى بقية الكتل الكف عن المزايدات والمهاترات والبيانات البوقية الي لا تنفع ولا تضر وبس تضيع علينة الوكت , يا اخي انطوهة للحكومة لنوري المالكي وحدة , وخليكم كلكم معارضة وخل نشوف , واذا شكل نوري المالكي الحكومة  فخل أوصيه بأمر واحد , بطانتك فاسدة حيل حيل , من مستشارين ومدراء عامين وممثلين كل من يدور حولك غيرهم يا أخي غيرهم والشعب انتخبك ألك مو لبطانتك وبطانتك ضيعتك وضيعتنة ترة , و اني هم أدعو الاخوة في جميع الكتل لو شاركت المالكي فعليهة بطلب تغيير بطانة المالكي امتثالاً للقول البطانة أغلى من الوجه..