يحكى أن العباس بن علي بن ابي طالب عليهما السلام والذي إستشهد في واقعة كربلاء أعاد البصر لأحد العميان الذين زاروا قبره الطاهر في مدينة كربلاء. وما أن ذاع الخبر حتى تسابق الكثير من العميان لمسك الشباك بكل قوة والدعاء لله تعالى عسى أن ينور بصرهم. حتى لم يعد مكان للأعمى الذي يأتي ورائهم ليجد له محلا يمسك فيه الشباك لأن أقرانه من العميان الذين سبقوه لايتركوه بسهولة ولذا فلا يأتيه الدور الا بشق الأنفس.

وقد أصبح هذا المثل ينطبق على كل من يرفض التنازل عن الشيء الذي يمسكه بيده. وقد تذكرت هذا المثل اليوم بعد كلمة السيد رئيس الوزراء الحاج ابو إسراء والتي قال فيها هناك إستحقاق إنتخابي ولن أتنازل عنه ولن أخذل الشعب الذي إنتخبني في اشارة الى فوزه بالإنتخابات البرلمانية الأخيرة وهو مايعني رفضه التنازل عن منصب رئاسة الوزراء. وقد أيقنت اليوم أن الحجي ينطبق عليه هذا المثل وهو ليس بوارد ان يترك شباك الحكم لغيره.

بس والله ياحجي هذا مو إنصاف ، يعني ميصير العميان واكفين سرة وراك ينتظرون يجلبون بكرسي الحكم بلكي الله يفتحهه عليهم، اي دنطي مجال الواحد منهم ، سويهه قرعة لو شوف ياهو اكبر واحد بيهم بالعمر مو خطية تحرمه من نعمة السلطة . الحمد لله اللي فتحهه عليك وعلى ابنك حمودي وعلى نسابتكم ، عفوا اقصد الأستاذ النائب حسين والاستاذ النائب ياسر والمستشار الاعلامي ومدير المالية وغيرهم من الحبربش وحتى سواقك ايام المعارضة صاروا من أصحاب المليارات، مو كافي بعد يعني متشبعون.

مو العراق احترك بعهدكم ونعلتو سلفة سلفاه، هم كهرباء ماكو ولا ماي صحي والشوارع كلهه طسات والمجاري متروسه بصخرات عبعوب وفوكهه انوب داعش! حجي الف مليار دولار تتصرف بيهه وما كدرت تحل مشكلة من مشاكل العراق يعني أكو فشل أكبر من هالفشل؟ لا جيش بي خير سويت ولا قرية عمرت ولا إنسان بنيت يعني شلون تريد كل العراقيين يقبلون بيك؟ داعش اللي ينطبق عليهه المثل اجاك خلاف ركب عالجتاف طلعت أحسن منك ، تحتل مدن وتوصل قريب من بغداد وانت نايم بالمنطقة الخضراء وقواتك تشرد من الموصل وكركوك وتكريت وديالى.

بس انت امبين صدك اعمى وجلب بشباج العباس لان الحكم فوك طاقتك واجاك راس كله، جنت تحلم تصير مدير مدرسة لو مدير ناحية لو كلش كلش قائمقام طويريج وفجأة رئيس وزراء العراق. يابه حقك ليش هيه لعب ، كاعد بقصور صدام وميزانية 100 مليار سنويا تحت ايدك ولا رقيب ولا حسيب، العب بيهه يابو اسراء ، وآني اتيقنت اليوم انه انت ماراح اتهدهه حتى لو ماعندك اغلبية برلمانية وحتى لو تقسم العراق وحتى لو صارت حرب اهلية ، وخلي البقية اللي ينتظرونك تنسحب إمشون بوزهم وعمرهم ما راح يوصلون الشباج الحكم فقد قضى أبو إسراء ببقاء الوضع على ماهو عليه وعلى المتضرر مراجعة مدحت المحمود وراح يقبض من دبش!