هاي سنه من السنين جنه بالبصره ايام حربنه وي ايران وطلعت اجايزنه متأخره من يم الآمر لان جانو الضباط بجيشنه العقائدي على كَولة الاعرجي احقر ما خلق الله .. المهم طلعت الاجايز قبل الثنعش باليل واحنه نتكَله اتكَلي ,نريد بس كون نوصل من وكت للكَراجات خاطر نكَضي الليل بالطريق ...
ماطوله عليكم اجه النايب ضابط من اهل الحله وبيده الاجايز , وهو هم من ذوله الهتليه مال كَبل... .. وكَف وضل ايصيح علينه يله اصعدوا بالايفه ( سيارة الجيش ) بسرعه واني اوزع الاجايز....يله فضوهه قشامر
والمكان اظلم ... صعدنه تقريبا خمسين واحد ...وصرنه شي فوكَ شي اتكول دجاج مصلحه .. اسكتو اسكتو ,, محد سكت كله تدردم ,, رد صاح علينه اذا ماتسكتون اضم الاجايز واروح انام ...
وجان تجيه عفطه من داخل الايفه ... بس شلونه عفطه اصليه , يعني ذاك الزيج المعدل ابو سبع ارقام ,من هذا مال سرسريه الكَياره من حملة شهادات السربته والدياحه والعركَـ بنوعيه زحلاوي وبعشيقه
وهي كله سكتت وصارت صنطه .. محد بعد كَدر يتنفس ... نايب ضابط يخوف خو مثل هسه كله تتمقلج على الحكومه وتتنفس من خاصرته ... اتكَول امبايعين الله فرخ جمل
وهو دك روحه النايب ضابط اليوم ماتروحون الا تكَولون منو عفط !!! سكته محد حجه .. هدد..صيح... بعدين اخذ الاجايز وراح ... اني كَلت خاف واحد من ربعهم لان منو يكَدر ايسوي هيج الا واحد قريب على جماعة القلم...
كتلهم عمي هذه المصيبه ماتنحل الا انجيب جهاز كشف العافط.. وهي كله ضحكت .. بس ضحك مال خوف
المهم وره شويه نزل واحد من ولدنه وكَلي خويه فرحان ... تره اني العفطت وقصدي اشاقه بس من شفت النايب ضابط ابو كريم صار عصبي خفت يرزلني كَدام الناس... اني هم اخذت ناس كبار ورحنه طحنه عليه وبسنه راسه وفهمته منو عفط وحصلنه الاجايز وفلتنه
هسه رباط سالفتنه ...اخوتنه بالغربيه اغلبه تعفط ... ساعه ايكولون ضد الاحتلال والعملاء وساعه ضد الصفويين والمجوس, وساعه ضد التهميش وانوب انريد تقسيم , وناس اتكول ثوار احرار وناس اتكول دواعش اشرار ... وبالنهار ويه الحكومه وبالليل ويه الدواعش حلكَ بحلكَ للصبح ..
ولدنه ياهو يذبح بيهم ....مافي معلوم ..... ياهو ايفجر.. مافي معلوم... ياهو ايعفط ,, مافي معلوم بابا.. يعني
خبطت وضاعت علينه ... وصاير العفاط ابفلس وياهو ايكضونه ... وصاحو لالالا هذا رجال بري مو هو العفط ... اخذتوه لان سني , جا شنو فكركم .... الذبح ايصير بالرمادي ... نروح ناخذ ابو البصره لو ابو العماره
هي شو ظلمه وكلهه متنكَبه ( مُلثمه ) شلون انفرزن الارهابي من الشريف ... فاحسن شي انجيب جهاز يكشف الارهابي من يكعد عليه اذا طووط الجهاز يعني ارهابي واذا سكت يعني ماعافط... وناخذ اجازه بحكم العراق... والا هيج ماراح تخلص ويوميه .. جيب الليف ودني الليف.
|
