ردتك وطن مو أرض مهجورة..!

ردتك وطن , أحلى وطن , مو أرض مهجورة
يسكنها قطاعّ الطرق وأكلاب مسعورة ّ!
ردتك وطن . بيه الفرح عالي أبسماه
وشمسه تضوي ابنوره ..
مو مقبرة . . مو مجزرة .. مو مسخرة . .
مو مدن تغزوها الذئاب وبشر مذعورة !
ردتك وطن بيه الحياة الحلوة .. بيه الناس تفرح
وطن .. موبس خارطة وصورة !
والصورة صارت ست صور, متمّزّقة
وأكًبال عيني أمراية مكسورة ّ..!
ردتك وطن , أبو الحضارة من صدق مومن كذب
موجاهلية أمبينة بالأنسان , بالحكّام , منظورة
ردتك وطن تننشاف جنة أبكل وقت
موكورة مشتعلة ابجهنم ّ.. أوين مانلتفت كورة !
مو بلد بيدين الحرامي ,
الناس تسكن بالأخيام وهو يبني أقصوره !
ردتك وطن تضحك لك الدنيا زهيّة
وطن . مو خيمة عزا ,
والناس تبكي بيها مقهورة ..!
ردتك وطن مو مزربَة
بيها زرابين الأجانب خايسة ومطمورة ..!
ردتك وطن كل يوم ينباسّ أبجبينه
الناس عشاق ابهواه
وبالمحّبة والورد يبنون سوره
وطن .. مودولة خرائب
بيها مرمية الجثث عريانة مومستورة
مذبوحة باسم الدين تاكلها الكلاب
وأرض كله اقبور محفورة ..
وطن .. مو دولة أكاذيب وفساد وفهلوة
كلمن أله , وكلمن وناطوره ..!
ردتك وطن محروس بأهله وجيشه
وأجنوده وحدوده وعالي سوره
موجيش شارد, بلا قايد . . طرطرة
عايف تفكته ومدفعه وشاجوره !
ردتك وطن أتباهى بيه , وأفرح أبعرسه ,
وبساتينه, وأنهاره , وفرحة أطيوره
ياحيف ياوسفة عليك وعلى هذا الشعب
الضيّع حقوقه ومحّد أيشوره ..!
ياحيف وياوسفه عليك وعلى هذا الشعب ,
أسمه بالحصاد . ومنجّله مكسور
ومسحاته مكسورة ..ّ!
ياوطن الأحلام يالمذبوح بسيوف الطوائف
وأنا احلامي غدت وياك مغدورة ..!
أشبقى عندك ؟ غير الاف الأرامل واليتامى
والخيام أبكل مكان ومدن مهجورة ؟
شبقى عندك ؟