| نوع من انواع الدعايات الانتخابية |
قبل ان ينهي سيد خلف محاضرته التي خص بها عشيرتنا هذا اليوم، رمى بعمامته السوداء على الارض وبانت صلعته الحمراء المتعرقة وهو يصرخ بنا : ( ولكم شبيكم ماعدكم غيرة على مذهبكم شتكلون لعلي بني بي طالب ؟ تكولولة انتخبنا الشيوعين لو العلمانيين الكفار شتحجون وية ام البنين ؟ تكلولها احنا خذلنا الحسين بكربلاء احنا تركنا العباس تتكطع جفوفه احنا كطعنا المي عن عبد الله الرضيع ولكم حطوا براسكم شوية عقل لتبقون سفهاء لتبقون معدان لتبقون همج القائمة ال ..... الي الله ورسوله مباركيها ( بأعلى صوته ) هاي قائمة شهيد كربلاء قائمة الطف هاي قائمة زينب الحرة وام البنين والسجاد قائمة ابو الجوادين والله راح تظلون بيوم الحساب تفرون بذانكم اول سؤال راح يكولك شنتخبت ؟ شراح اتجاوب ؟ اتكلهم انتخبت العلمانيين ؟ طيح الله حظكم اذا صدك سود الله وجوهكم يامعدان اذا صدك اليوم انتحر كدامكم هنا اليوم اموت هنا اكتل روحي اذا ما تحلفون براس العباس تنتخبون القائمة ال ........ يالله احلف حجي رشك انت اول واحد احلف بالعباس وخل يحلفون وراك واحد واحد تقدم حجي رشك خطوتين وهو تحت تأثير الصدمة والرعب والخوف من صراخ سيد خلف ونبرته الحادة ارتجفت يداه ونشف ريقه وهمَّ بالقول : عمي احلف بالعباس .... لاتحلف (جاءه الصوت من فاهم ابن مهدي ) ... لاتحلف . العباس شنو دخله بالانتخابات ؟ ( التفت الى سيد خلف الذي انشغل باعادة عمامته الى صلعته ). آني احلف ( اضاف فاهم ) احلف بالعباس ابو فاضل احلف بالعباس ابو راس الحار سيد خلف وجماعته اكبر جذابين وين جانوا عنا هذه السنين وهسه جايين ؟ وين جانوا من مرت علينا سنين شفنا بيها الظيم ؟ وين جانوا من اطفالنا ماتت بالحصار؟ وين جانوا من نسوانا كامت تجدي بالشوارع ؟ وين جانوا من بعنا حتى شبابيج بيوتنا وطبخنا حتى الزبالة ؟ وين جانوا من جانت لكمة الخبز حسرة علينا ؟ شو محد اجه وكال انتوا اهلنا وتجمعنا وحدة المذهب عاشوا كل حياتهم متنعمين ووجوهم حمرة ونسوانهم يفترن من دولة لدولة ، واحنا خيرتنا كامت تبيع زوري وخيرنا كام يشتغل بالبالات ليش ما كالوا اهلنا ماتو من الجوع ؟ اطفالنا ماتت بين ايدنا وماعدنا فلوس نعالجهم بناتنا نعال ماعدهن يرحن للسوك شو محد سأل علينا ؟ ومحد خاف من يوم الحساب ؟ ومحد منهم استحى من الحسين والعباس؟ اطفالهم اغلى من اطفالنا ؟ لو نسوانهم احسن من نسوانا ؟ لو شبابهم الفاهين احسن من ولدنا ؟ لاتحلف حجي رشك ، آني احلف ابدالك ذولة جهنم ارحم منهم جم مدرسة ومستشفى بنوها بفلوس الخمس بايران جم قصر بنوا بلندن ؟ جم سيارة جانت تمشي وراهم ؟ واحنا بالتاتات نخاف نصعد خاف ماعدنا كروة احنا اهدومنا تكطعت علينا شفنا الضيم والقهر هم الجوع وهم صدام المجرم انسنجنا وانكتلنا ومتنا والامراض لعبت بينا جولة وهمه كل واحد منهم وجهه هاعرضه ومتفح وعلباته تكول تاير لاتحلف حجي رشك الانتخابات مو إلنه الانتخابات إلهم حتى يكعدون بالقصور وينهبون ويفرهدون براحتهم موانتخبناهم ذيج المرتين شقدمولنا ؟ شو زاد الضيم والقهر وطاسة مي نظيف ماكو ببيوتنا انتخب الشرفاء التعرفهم وبس ... اطلع بره حجي رشك وشوف سيارة سيد خلف وشوف لاندكروزات الحماية شوف اتباع آل البيت إسال سيد خلف كله وين بيتك مولانا ؟ منيلك بيتين بالجادرية مولانا؟ منيلك عشرين سيارة مولانا؟ منيلك بيت بلندن مولانا ؟ وين بناتك مولانا ؟ بناتك ليش ما يجون يعيشن ضيم بناتنا ؟ شنو بناتك نازلة بيهن آية مولانا؟ اسمعوا اخوتي الله ما يشتغل بمفوضية الانتخابات حتى يحاسب على التصويت والحسين نصير المظلومين مو نصير الحرامية والعباس يكره اهل القصور والسيارات المسروقة من دم الناس وام البنين تحرس اولادنا لا ... لا سيد خلف احنا ما نحلف روح شوف غيرنا بعد محد يضحك علينا اليوم عرفتونا وصرنا احبابكم ؟ عشرين سنة دينار واحد ما وصلنا منكم لو واصلنا دينار واحد جان صدك كلنا عدكم شرف ضحكتوا علينا هواي كافي لهنا وكافي بعد احنا مو لعبة بيدكم ولدنا قندرة ماعدهم وغيرنا اشترى النجف كلها ولدنا ماشايفين الصويرة اولدكم من سويسرا لامريكا يقبل الحسين والعباس بهاي؟ الحسين والعباس ولد رسول الله من حاصرتهم السيوف ما شردوا ومن ضاقت بيهم الدنيا ما عاشوا بلندن الحسين والعباس مامدوا ايدهم على بيت المال وانتوا ولدكم اخذوا البيت والمال .. اسمع سيد خلف هاي قوانة المقابر الجماعية بعد هم ماتمشي علينه المقابر الجماعية مقابر ولدنا مو ولدكم ومن ولدنا اندفنوا جوه الكاع ولدكم جانوا يصيفون بفرنسا .. اطلع بره سيد خلف ( بصوت اعلى ) اطلع برا بعد ما ينضحك علينا احنا نعرف دربنا والمرجعية هم نفظت ايدها منكم والائمة ائمتنا نصراء الفقراء والمساكين نسوانا الطاحت من الجسر مو نسوانكم واطفالنا الماتت على الجسر مو اطفالكم اطلع بره وصلت حدها وياكم اطلع اطلع .. اطلع .. عدل سيد خلف من وضع عمامته وهو يرتجف وقد اصطبغ وجهه المدور بحمرة . سقط فاهم ابن مهدي على الارض بعد ان ارتفع ضغط دمه وهرع اليه ابناء العشيرة يحملونه متجاهلين خروج السيد ذليلا منكسرا يردد مع نفسه .. * المعدان وقود جهنم .. المعدان قرود .. المعدان دبش .. المعدان حمير |
