نعمة فضيلة وألف الحمدالله والشكر الجاهل والمعگل و المفرّع وحتى الحديثات كلها صارت أمفتّحة باللبن وتفتهم بالتكتيكات خوب التجاذب والأستقطاب صار مثل سالفة دوسلها مال قناة الشرقية التوّزع بيها عل الوادم بايسكلات
المهم معلينا من هذا الخرط بس عندي سؤال , أريد أشمره علّي يفتهمون بالغانون خصوصاً الخبراء بدبّاگة ومتون الدستور حفظه الله
بالنسبة للشهر الخاص بتشكيل الوزارة يعني لازم يخلص حتى تظهر الوزارات ؟
لو يصير تطلع الحقائب وتنال الثقة وتشتغل قبل أنتهاء آب ؟
عوذه شلون شهر طايح حظّه صار أطول من حرب أيران والعراق
فوكَ الحر و الحريج والفواتح النوب علينا أنتظار , عٌمر وخلّصناه بالضيم لايفلان 
بويه أنريد فرج وهو لايأتي دون بوادر وتنازلات ونكران ذات 
صحيح أن المواطن يسكت ولكن تأكدوا بأنه مثل المسودن ما ينسى سالفته ويبقى يعيد ويمسلت و يصقل طالما بقي على قيد الحياة , وبهذه المناسبة التأريخية ونحن ندخل الأسبوع الأخير من الشهر المشؤوم إيّاه نذكّر الفطاحل بأبيات عبد الرحمن عيسى التي أهداها لشقيقه علاوي رحمه الله :
عمر الوزارة أقصر الأعمار والظلم داعية لدار بوار
كم بالعراق منازلاً مهجورةً كانت لكل معظّمٍ جبّار
درست وغيّر أسمها وتبدلت وكذا تكون منازل الفجّار
نريد منكم أنتاج بدون مكياج و أنجاز ليس بأعجاز و برامج توصل الناس للسلام
جميعها ممكنة لو طهرّتم أنفسكم من أوبئة التاريخ و براثن التخندق والأنحطاط , أنتخوا لأنفسكم قبل أن تنتخوا للعراق عندها سيتحقق السلام بمجرد تغليب الهوية الوطنية والأنسانية وسيمجدكم الله والتاريخ والأجيال و ستبقى دياركم عامرة ليست كنهاية منازل الفجّار 
هم گولوا مگال ؟