اني بصراحه كلش أيّست من باجر وابو باجر وام باجر ومستقبل الاجيال الراح تتلطم وتضيع بسوكَ الحاسبين ارواحهم انصار ابناء المراجع والمذهب, وانقهرت كلش وغسلت ايدي من العجس بكافور 

ولو لاكَي بعثي عده حوض تيزاب زايد جان ذبيت روحي بيه وخلصت 

عود وهاي همه موامنه ويصلون ويمشون للزياره وعدهم مواكب تسوي ثوابات ينذب نصه بالزباله واكو ناس جوعانه , ومن ايخلص عاشور اخته اذا عده ايتام مايسال عنه ولايعينه , ولا يرحم اخوته اذا بيناتهم ورث , ويبوكَهم عينك عينك, لو ياخذ رشوه بالشغل على ابو كراميه, 

لو يلغف راتب اعاله من الحكومه وهو يشتغل اومزوج ومامسجل بالنفوس وياخذ تقاعد باسم ابوه!!!... لو برمضان يسوي الدوام ساعتين وعايف معاملات الناس ويصلي نوافل ,ويصيح على الفقره ويرزل بيهم , فوكَـ الحر الكاتلهم ,اتكَول خدم عد الخلفوه 

جا لو سرسريه اولد شوارع شيسوون بينه ,بس اني القهرني مو لا جم واحد مسودن حد اسنونه وصارلي ابو جاسم وشتم وسب وصعدت عده الجاهليه من عاتبنه جبيرنه الله ايطول عمره, 

ولو لعناتهم ماتوصل لباب الشرجي لان جانت بالجلفي والملائكة ثقافته الهيه, 

بس كشفولي شلون احنه ناس رب التخلوف وعايفين الله ونعبد عبد الله وفريخاته حته لو جانو ايذركَون علينه ومسوينه غنم ويجيونه مناه ويردونه مناه ,وايسمونه معدان ومايشترونه بفلس

وانوب هسه الموديل الداير ,نعل الساده احسن من البشر , وافهم بالسياسه, 

جا عمي خوب لمو النعل مال الساده كله القديمه والجديده وسوولهه بطاقه تصويت بالانتخابات وهي تقوم بالواجب بدل الشعب الماعده حكَـ حتى ينشد شنو القصه وليش

سمعنه من التاريخ وشلون جانو اهل البيت ع عايشين بنص الناس ويشعرون بنبض الشارع وضغطه وسكره, ويبجون لبجيتهم ويجوعون لجوعتهم,

وسمعنه هم شلون امير المؤمنين بعد رويحتي وهو تاج راس الكل , يسمع للزغير وللجبير , ويجيك واحد مايعرف شلون يتوضه ويكَلك ليش قبل بالتحكيم وليش قبل براي الناس والصحابه الي بجيشه ... 

هذا والرجال عاش قبل مئات السنين, عرف شنو يعني الرأي والراي الاخر وشنو معنى الديمقراطيه والتصويت, وهو يعرف روحه امام حق وعدل ... مو صحيح لو اني غلطان

يعني اليمه ع ماجانو ايفرضون على احد حته على عدوانهم لا راي ولا قرار, ولا توصيه , وكله بالاقناع والتوضيح والحجه والبرهان والتاريخ مليان بهيج قصص , 

لو انتم ماقارين ولا سامعين بس خطب قادتكم النازكين والمدسملين الي طلعوونه تالي وكت باليانصيب ,

القسل اي والله القسل , على كَولة اهلنه بالناصريه