من المضكورات المهمة في الكتب هي القُبل يعني (البوسات باللهجة العامية الفصحى!! ) وسوالف البوس هواية ماتخلص واهم بوسة هي (بوسة) الحياة .. يعني (قبلة الحياة) ، شلون راح تگضي السالفة كلها ترجمة !! بعد ما اترجم خوش ؟؟ المهم ، والوادم متعودة تتباوس اثناء التوديع والاستقبال وبوسات الوداع مضكورة بالكتب هواي ..
يگول ابو الطيب المتنبي :
للهو آونة تمر كأنها

قُبلٌ يزودها حبيبٌ راحلُ

وادم تتلهى بالبوس صدگ لو گالوا الماعنده شغل... !! أكيد ماعنده واسطة والا چان تعين واشتغل.. همزين ما افتهمتوني صح !! ماعلينا بالوادم.. نرجع لسالفتنا يگولون بايام النظام الساقط ابن الساقط !! چان واحد من ربعنا مال گبل !! شارد .. ورجع من سقط النظام الساقط وفتح حزب على باب الله !! وچان جايب وياه مرته اجنبية وعنده منها ولد أحمراني طالع على خواله وعيونه زرگ .. المهم يگولون صاحبنا .. طلع يريد يشوف احوال الرعية (اهم شي الرعية ) لأن كلكم راعٍ وكلكم مسؤول عن رعيته .. بس اكو رعيان (غمان ) مو برتقال !! لأن اني الثغ بالراء !! ماعلينه بالوادم !! هذا الزلمة طلع وعاف ابنه ومرته يم العجوز !! والعجوز اجت للولد الاحمراني وتركض وراه وتريده يسلم عليها ويبوسها !! چا غير هو ابن العزيز !! بس الولد مايعرف يحچي عربي مو انوب شروگي !!.. والعجوز گالت : وسفة !! عاف بنات عمه وين الحلوة والمگذلة وراح اخذ من الانگريزيات !! وحتى فروخهم ماتحترم حبوبتهم .. وبهاي الاثناء صاحبنا خلص من الاجتماع وقام بتوزيع الواجبات الارهابية على اعضاء الحزب مال قردغان !! واول ماطب للبيت لگه العجوز تبچي .. ها يمه شبيچ؟ ـ روح اسأل مرتك الگطعية .. ماتخلي ابنها يبوسني يمه بس ابني مايعرف يحچي عربي والبوسة بالانگليزي (kiss) . لاتضوجين يمه هسة اذا مايبوسچ انعل والديه .. تعال بابا بسرعة .. (kiss) حبوبتك .