أكثر العوائل العراقية بيوم الجمعة تتغدى سمچ مسگوف , لان عطلة وكل أفراد العائلة گاعدين وهيچ يوم يكون مميز فلازم الأكل يكون مميز , وطبعاً ماكو أكلة أرقى وأطيب من السمچ المسگوف العراقي ..
أني بالنسبة الي كلش أكره السمچ المسگوف لان بسببة ردت أفقد أبويه , ومن يومها أبد ماأكلت السمچ لان گمت أتشائم منه وكل ماأشوف السمچ أتذكر اللي صار بأبويه بذاك اليوم ..
بيوم من الأيام أبويه جمعنا وگال اليوم أخذكم للمطعم أغديكم سمچ مسگوف , أحنا كيفنه حيل ..
گعدنه بالمطعم وجابولنه سمجة مسگوفة كلش چبيرة .. 
بس يمكن چان بيها هوايه ملح لان أبويه من خلص أكل إرتفع عنده الضغط ووگع بالگاع ..
أحنا گمنا نصيح ونبچي ونهفي عليه ونذب مي على وجها بس هو أختنگ وأغمى عليه ..
أخر شي أجا أبو المطعم يركض شاف أبويه واگع بالگاع ..
گله : گوم گوم حجي أنت مو يومية تاكل وتسوي نفسك تريد تموت اليوم تدفع الحساب يعني تدفعة ..
وراها أبويه گام ودفع الحساب وأخذني للبيت چلاليق لان نسيت أگله هذا المطعم سويناها بيه الأسبوع الفات .