المسلسلات العراقية أيام گبل چانت كلش حلوه وبيها معنى والها تأثير بحياة الناس ..
وچان من يطلع مسلسل بالتلفزيون العائلة كلها تنجمع على التلفزيون وتتفرج وتكون كلش مستمتعة بوقتها أثناء مشاهدتها هيچ مسلسلات راقية ، لانها فعلاً چانت تستحق المشاهدة ..
احنا چنا كلش نحب مسلسل ( الذئب وعيون المدينة ) وجزئها الثاني ( النسر وعيون المدينة ) چان مسلسل كلش حلو وقوي والعوائل العراقية چانت كلها تتفرجة بذاك الوكت ومتفوت حلقة ..
چان من يطلع ننجمع على التلفزيون وأبويه چان ميخلي واحد يحچي حتى لنشوش على المسلسل وأمي چانت تحب المشاهد اللي تطلع بيها ( گمرة ) أم الباگلة ، تگول أني أحب بس گمرة بالمسلسل لان خطيه عميه وتبيع باگلة وهذا ( رجب ) يحبها ويومية يگعد يمها ويساعدها ، وتبقى أمي صافنة على گمرة وجدر الباگلة مالها ومتعجبه عليها لان عميه وتبيع ، وكل ساع تگول لأبويه : أگلك .. هسه هاي شلون تشوف الفلوس وشلون تبيع وهي عميه ..
أبويه يجاوبها يگلها : يمعوده ترا هذا تمثيل مو صدگ ، هاي ممثلة وتشوف , بس هي دورها على أساس عميه ..
بس أمي بقت معجبه بدور گمرة أم الباگلة ..
وبيوم من الأيام رجعت من المدرسة ، لگيت أمي خاله جدر باگلة وگاعده بالباب وصافنة ..
گلتلها : يمه هاي شنو .. شتسوين ؟!! 
گالت : أبيع باگلة .. 
گلتلها : صدگ چذب يمعوده هسه الناس شتگول علينه !! 
گالت : وأني شعليه بالناس ، الشغل مو عيب وأني أشتغل على باب الله مثل گمرة .. 
گلتلها : زين ليش صافنه ومترمشين ؟! 
گالت : مسويه نفسي عميه مثل گمرة حتى الناس تشتري مني .. 
گلتلها : لالا يمه هاي الشغلة أبد مينسكت عليها ، أحسن شي أروح لأبويه وأكله وهو يتصرف ..
دخلت للبيت لگيت أبويه لابس دشداشة بازه وعرقچين مزروفة ويباوع بالمراية !!
گتله : هاي شمسوي بنفسك يابه ؟؟!
گال : بشرفك مو أشبه رجب ؟
گتله : وأنت شكو تقلد رجب ؟
گال : لك أثول تريدني أعوف هل عميه وحدها تبيع باگلة ، غير أروح أساعدها ..
عود رحت أشتكي لأبويه من أمي لان مقلده گمرة ، طلع أبويه مقلد رجب .

المسلسلات الها دور كبير بثقافة الأنسان ، وأكو ناس تتأثر بالمسلسلات وأبطالها ، بس بذاك الوكت المسلسلات چانت كلش محترمة ، والناس چانت تقلد گمرة ورجب وجدر الباگلة .. بس مسلسلات هل وكت اذا الناس تريد تقلدها شراح تسوي بنفسها ؟!!!