هوايه ناس تحب تربي حيوانات ببيوتها ك هواية ..
مثل الطيور والعصافير أو أسماك الزينة .. الخ
وطبعاً هيچ أنواع من الحيوانات تكون حلوه بألوانها وأصواتها وتضيف جمالية للبيت ..
أبويه الله يرحمة ويرحم والديكم هم چانت عنده هيچ هواية , وهي تربية الحيوانات الجميلة اللي تضيف لمسة فنية للبيت , بحيث چان مربي ( طلي ) 
وچان مداريه حيل ومعتني بيه وچان كلش متعلق بيه ..
بس المشكلة چانوا الجيران كلش متأذين ويعانون من هذا الطلي , لان يوسخ المنطقة , ومن الصبح ل الليل يغرد ويصيح مااااع مااااع ماأدري شيريد ..
ويوميه الجوارين داگين الباب علينه ويگلولنه يمعودين سكتو طليكم لان دوخنه ..
بيوم من الأيام گلت أني لازم أخلي حد لهاي المهزلة , لان گمت أخجل من الجوارين لان أحنا مسببيلهم أذيه ..
رحت لأبويه گتله أسمع يابه ترا الشغلة بعد مينسكت عليها وهذا الطلي بعد ميبقى بالبيت , وهددته گتله إختار اليوم لو أني لو الطلي بهذا البيت ..
عاد وراها أخذت هدومي وطلعت من البيت لان أبويه إختار الطلي ..
وبقيت يومين نايم بالشارع من ورا الطلي , مجنت أتصور أبويه چان يعز الطلي أكثر من معزته للجيران والي .. 

حلو لما الأنسان عنده هواية ويحب يمارسها بالبيت , بس الأحلى انه مابيها أذية على جيرانة ..
والناس بهذا الوكت هواياتهم تطورت وگامو يربون بدل الطلي قطيع أغنام ويخلوه بنص المنطقة , وأكو ناس تارسه السطوح طيور والجيران تصيح الويل منهم ومن طيورهم ..
هاي شنحطلها وتطيب?!