ام حسين جيرانه كَاعده اباب بيته صار جم يوم واعيونه مغوركَه من الدمع وتباوع للدرب, من سمعت بالصقلاويه لليوم ..لان ايكَولون انه حسين ابنه الوحيد اهناك,

وشلون اتون ونيين ايفطر الصخر ومكَابلاته جم وحده من نسوان الدربونه ,هاي الرايح اله ابن , هاي زوج, هاي اخو , ذيجه اب . بحروب العراق الي ماتخلص الى يوم يبعثون, وهيه تنعه اوصاحباتهه يونن وياهه

اجانه العيد يمه وانته ماجيت ....ممروده روحي ومظلم البيت

شو طولت يانور عيني ...ربعك شكلهم من يجوني

كَلت خلي اروح اصبّره واخذ بخاطره خطيه مالهه احد ..زوجهه ابو حسين خطيه هم راح بالتفجير مال الاولى بفاتحه وجانت يوم ثالث متروسه بشر من هاي الناس الفقره وظلت بس هيه وابنه

ـ ها ام حسين شلونج ؟ .... كَولي يالله خويه, هسه يرد انشا الله , وهذا عيد الله الجبير ,بلكي ونعلّله اليوم , باجر يمج, شويه انطيه صبر

شالت راسه وباوعتلي بغيض وعيونه حمر دم من البجي

ـ عيد الاكشر علينه يابو كوكه... عيد المصخم ياخويه... ياعيد ياصبر يالطام و حسوني ماادري بيه وين ماوين

واستأنفت ونينهه

مدري الدواعش سبكَوله ...... مدري عليه دارت انغوله

شفته شغلته داجه وصايره نار,اني هم خالكم انسحبت برشاقتي المعهوده من يمهه كَبل لا تسلكَـ ابو ابوي ,اتلكتني بتي كوكه يم بيتنه

ـ ادلك بويهه ام حسين ليش تبجي من الثباحيات

ـ بويه ابنه حسين بالجيش وماراجع بعده وهي تبجي عليه

ـ جا بويه ختيه , روح جيبه وتعال ..عفيه

شنووو؟ اشششش لاتسمعج المره بت النعال.... لا يارعنه على هاي الطلعه الماصخه ,

ـ منين اجيبه ؟ شنو رايح خطار يم ناس واروح الهم واجيبه.... بحرب ايران والدرب آمن للوحده العسكريه واروح للخلفيات وانشد عليه .....

شو الغربيه جوله ومليانه اراول ودواعش من كل الالوان والجنسيات, وصايره هوسه ماينعرف الداعوش امن المدعوش بيه

هسه هاي الشباب شنو ذنبه ..خرفان اتودونهم بنص الجلاب مال الغربيه ...وطايحيلهم ذبح .. على شنو؟ ومنو يستاهل؟ .. اشو الوطن صار عدهم رخيص ومايسوه نعال بس طاح ابنهم طكَعان وحلفو مايخلون حجاره على حجاره .. وكل يوم ايزيدون حقد ونذاله.. وكلشي مايفيد وياهم... ﻻتنازل وﻻ مقاعد وﻻ مناصب ... لو نسلم الهم الاكو والماكو مثل كَبل لو انظل نحسب جثث واشلاء موذره توذر ونكَضيهه فواتح ... وساكم الله بالخير ... ما ساكم الله بالخير..

و ابشركم مكَبرة النجف راح تطبكَـ عله كربله ....مكَبره وحده, اوطن واحد وغماميه وحده

عمي اسحبو ولدنه انعل ابو الموصل يا ابو اﻻنبار ... وهمه اذا ببهم خير ايخلصون أرواحهم اذا صدكَـ مايريدون داعش .. عمي كفيلكم ابو فاضل يعرفونهم ويندلون زواغيرهم واحد واحد , بس لازمتم العشايريه ومايكَومون الا ينداس على ذيلهم

صدكَـ جذب يوميه مسوين مجزره بولدنه الزغار... ولد الخايبه .... عليمن؟ شنو ولكم طليان فدوه خو مو طليان فدوه ..

ويجيك واحد بطران وفايخ ابن فايخه بهاي الساعه السوده ويكَلك عيدكم امبارك انشا الله من العايدين, والله اليدري عايدين السنه الجايه لو مذبوحين بسجاجين المقبولين من صوب الغايد ومن صوب المتحجّي الزين,

وانعل ابو الغيره الماتهتز على هاي الشباب المظلومه...

لابو حتينه عزت الدوري .. اي والله