من صغري وأني أضوج من طبيب الأسنان , لان الأدوات اللي يستعملها مرعبة .. 

بس مرات نضطر نراجع طبيب أسنان لان وجع السن محد يگدر يتحملة ..
مره سني هاج عليه بالليل وللصبح مخلاني أنام وگلت بس يصبح الصبح أروح أراجع الطبيب ..
ومن صار الصبح گبل لبست ملابسي وطلعت أدور طبيب أسنان , بس چنت نعسان حيل وتعبان والمشكلة الصبح ماكو أطباء بس العصر يگعدون ..
المهم گمت أدور لحد ملگيت طبيب مفتح وهمزين چان فارغ ماعنده مراجعين ..
أني من حلاة روحي رأساً ركضت عليه وگعدت على الكرسي 
گتله : بسرعة بسرعة ..
گال : شنو بسرعة ?!! 
گتله : سني يأذيني شلعه بسرعة بسرعة ..
هو جاب دريل وگام يحفر وگبت الشعواطة , وراها گام يفلش ويلبخ ويبيض وينثر ومخلى شي مسواه .. 
آخر شي گال : كملت نعيماً گوم ..
أني گتله : أنعم الله عليك وگمت باوعت بالمراية على سني , طلع مسوي السن اللي مابيه شي وعايف السن اللي يأذيني !!
گتله : هاي شمسوي ليش هيچ ?!!
گال : مو هذا السن أقرب ذاك بعيد ماأنوشه !!
أني گمت أصيح عليه وگتله : طاح حظ الكلية اللي خرجتك وسوتك طبيب أسنان يا أثول ..
گال : ومنو گلك أني طبيب أسنان ?!!
گتله : لعد أنت شنو ?!
گال : بابا أني حلاق وأنت چفتت عليه وخبصتني سني ما سني وأني صارلي أسبوع ممستفتح گلت خل أستفتح براسك , منو الأثول هسه أني لو أنت ?!