المصيبه بالعراق العظيم ماكو شخص واحد يتحمل قيادة التظاهرات ويحجي بأسم المتظاهرين .. ومو خاضع للابتزاز أو المساومه ومو هاي الدوله أو ذيج تلعب بيه لعب .. شخص وطني أيكول أني أمثل المتظاهرين اللي أيطالبون بحقهم.. وهو وحده قادر على أن يتفاوض ويه الحكومه ويشوف مصالح شعبه اللي أنطوه ثقتهم.. واللي أيشوف مظاهراتنه والفوضى اللي تعيشها أيشبها بمثل هوسة حكومتنه الرشيده ..  ومظاهرات الرمادي والموصل وصلاح الدين ومناطق من بغداد بدون قياده مركزيه واضحه.. يعني كلمن أيكول أني , وبس أيريد يطلع بالتلفزيون حتى أتشوفه مرته الصخله وتفتخر بيه كدام أهلها المعفنين..ويوميه يطلعنه صخل أيكول أني ناطق بأسم المتظاهرين.. والحكومه حاطه مصياده مال فار وبيها جبنه كلش طيبه .. وتنتظر قناة الشرقيه لو قناة البغداديه, وتشوف ويامن تلتقي هاي القناتين.. وتكتب أسمه بالتايتل.. أذا كتبت ناطق بأسم المتظاهرين .. تكعد الحكومه وتخلي هاي المصياده وتنتظر شوكت يجي هذا الصخل وياخذ الجبنه وتصيده ..لو أيسلكون أبو أبوه وتلزك بركبته أربعه أرهاب ويخيس بفنادق أبو سراوي المعفنه.. لو يقبل بعرض أبو سراوي المغري ويفضها.. وهوايه من المرتزقه أيفضلون بجم دفتر, لوسياره أخر موديل وبعد لا تفك حلكك وينطيها اللهيب.. وأمثله هوايه من شيوخ عشاير قشامر بذاك الوكت وبهذا الوكت وأشبهم  بالجلاب ,أذا أنطيته يلهث وأذا ما أنطيته هم يلهث .. وهوايه من أحزاب أسلاميه وعلمانيه جيرت هاي التظاهرات ومطالبها بأسمها وبالوكت الضايع شافت هاي الشغله حلوه وحتى أتحصل على هوايه أصوات ,راحت  أشجعها ودفعت فلوس حتى تبقي الوضع بهاي الصوره..

السؤال.. ليش هاي الاحزاب هسه طلعت راسها وهي لحد الان جزء من حكومة أبو سراوي.. وين جانت كبل سبع سنين.. زين مو هيه بالحكومه وممكن تتناقش ويه أبو سراوي..  أشو وزراء ونواب وريس النواب جاه وين جنتو كاعدين.. وطبعا تعرفون هاي من متطلبات الدعايه الانتخابيه.. وحتى أستقالته هاي جزء من الدعايه.. لو هو أيريد مصلحه شعبه جان من أول أسبوع التظاهرات أستقال وكعد يم أبو ريشه وخصمها.. بس هذا فلم هندي يعبر عالزواج ..

التظاهرات اللي صارت وخلت الناس تطلع من بيوتها وأجتمعت بساحه.. جانت سلميه ومطالبها كلش قليله..وعدها حق دستوري وأخلاقي ..وما عدها ناطق يحجي بأسمها .. لانها عفويه وصادقه ..والناس جانت تريد أطلاق سراح المعتقلات والابرياء اللي بالسجون وملفات البطاله والخدمات.. هاي جانت الطلبات أول مره..بس حكومتنه غبيه.. ما عرفت شلون تتلافى هاي التظاهرات من أول أسبوع.. والاغبى منها ,عدما وصفهم الغبي الاكبر بالفقاعه والنتنين..وخلق مشكله من ماكو, وذوله عشاير يا أبو سراوي وعيب عليهم واحد يوصفهم بهاي الصوره .. بعد شيخلصك منهم ..أبو سراوي ذوله دليم ..وأنت جديد عالشغله بس جان لازم تسأل الفطاحل مالتك كبل متحجي.. وعبالك كلها أسبوع أسبوعين وكل واحد أيروح للبيت وتنفض الشغله.. بس شوف أبو سراوي ,هاي التظاهرات جان ألها صدى بالمحافظات الجنوبيه والوسطى وتعاطف كبير وأعتقد هيه مطالب كل العراقيين الجبناء..

والنوب المصيبه أبو سراوي سوى  لجان واللجان شكلت لجونه ..وبدى أينكط  كطره كطره وسواها مكرمه بس محد ركصله ولا هوسله..خرب عشيرتكم هذا لو صديم جان ذبحتوله الطليان وسويتو الجوبيه وأشتغلت البرنو بالطلقات ..وأبو سراوي يخرب عاللواكه بس هم ميخالف..وشكام أيسوي , يطلق سراحهم اليوم وبعد تلاثة أيام  قوات سوات ترد ترجعهم للفنادق .. والنوب زرب بيها أبو سراوي بعد أنكس.. منع هاي الناس من الصلاه بالجوامع .. وبالضبط  شلون جان أبو عدي يمنعنه من زيارة عاشوراء والصلاة بالحسينيات ..هسه أبو سراوي كاعد أيعيد نفس المسلسل بس بالعكس وعبالك كاعد ياخذ الثار.. وزيدها بأجراءات أمنيه وأعتقالات عشوائيه وأعدامات وتضييق حكومي على مناطق السنه وبس السنه, ومليشيات تفتر بسياراتها وتصيد الناس الطيبه والكوادر العلميه والطبيه..ومن يطلع بالتلفزيون ويحجي على الشراكه ونبذ الطائفيه وهذا العراق للجميع ويدعو الى وضع قوانين تحمي المواطنين..أيكلك والله عمي خوش ريس وزراء..بعد شيريد هذا الشعب الملعون..

المطلوب من ذوله المتظاهرين أن ينتخبون شخص مثقف واعي والاهم وطني ما تغره الشكليات يعرف بالوكت المناسب يحجي وشلون أيوصل مطالب جمهوره للحكومه..وعليه أن ميخاف من وسائل الترهيب اللي تتخذها الحكومه وياه..ولازم أيصير العكس بحيث الحكومه تخشى كل كلمه أيكولها..ونصيحه لوجه الله ..أبعدو هذا سعيد اللافي من التحدث بأسم المتظاهرين بالرمادي..

وما خفي كان أعطم