أكو تقرير أستخباري خطير وعاجل وسري وصل الاحد الماضي الى مكتب القائد العام للقوات المسلحه..هذا التقرير أيكول..أكو مجموعه من المسلحين اللي ينتمون للقاعده راح أيسون هجوم على المنطقه الخضراء بسلسله من التفجيرات بسيارات مفخخه وأحزمه ناسفه..وبعض ذوله المسلحين أيضربون بعض الوزارات السياديه.. الارهابيين اللي دخلو وزارة العدل همه عراقيين..والسيارات المفخخه بالتأكيد جرى تفخيخها بالعاصمه..يعني أكو مسلحين يرتبطون لو بالدفاع لو بالداخليه ..وذوله مو صغار وأكيد برتب عاليه وعدهم باجات يكدرون أيدشون بيها من كل السيطرات..يعني خلل بالسيطرات ماكو..خلي أقربلكم الواقعه..أني ضابط شرطه برتبة عميد وعندي هويه أكدر بيها أحمل سلاح وأعبر من السيطرات الامنيه بسياره بعربانه المهم أني مخول وأكدر أجتاز السيطرات..ذوله اللي فجرو وكتلو الناس البريئه بوزارة العدل همه من أهل البيت..الصوره واضحه هسه..

التقرير الخطير والسري اللي وصل مكتب القائد العام للقوات المسلحه..جعل المنطقه الخضراء والمنطقه المحيطه بيها في نفير عام.. وزارتي الدفاع والداخليه بأنذار كلش عالي المستوى .. ماكو أجازات والجميع على أهبة الاستعداد.. بس العدو شوكت يجي وشوكت يضرب محد يدري ..أبو سراوي وجماعته بأسهال متواصل .. شايفين واحد أيريد يضرط بس ميكدر ويتوقع بكل لحظه تجي ..هذا الوضع بهاي الصوره .. والغركان أيجلب بكشايه ..وطبعا أبو سراوي بلغ السفيرين الامريكي والايراني وضخم هاي الامور ..أول شي كطعو الجسر الجمهوري روحه جيه.. نشرو سيطرات متحركه وزيدو عدد السيطرات بعد وخاف هيه ناقصه.. من يم الجسر المعلق حركه كلش بطيئه ..أتشوف شرطه وجيش وسيارات أم الضوى وأم الصافوره وتشوف ناس قليله جدا جدا تمشي بشوارع الكراده والجادريه .. كلها خايفه من فد شي راح أيصير ..هوايه من الموظفين رجعو للبيوت وخابرو دوائرهم بالوضع ..وطبعا هذا صار عادي بالعاصمه اللي راح أتصير للثقافه العربيه وكولو زيزي ..واللي على باب الله كعد وأنجب بالبيت ..ويكولون كطع الاعناق والارزاق فد شلعه وخلي الناس تتلاطم ..هاي صار جم يوم عالهرنه ..وأجه اليوم الدامي ..

الجماعه أتوقعو راح أيصير الهجوم على المنطقه الخضراء وباكو هوى..تصورو القايد العام للقوات المسلحه أيعيش بهوس الانقلاب..هو نايم وهو يشرب وهو ياكل وهو كاعد بمنطقه حتى لفة فلافل متكدر أتفوت بيها ألا بموافقه مكتبه..وبيها السفارتين الامريكيه والبريطانيه..وبيها أكثر من خمسة الاف جندي أمريكي وأكثر من ألف بريطاني..بعد هذا الخوف ليش يا أبو سراوي..بس هو حقه لان معنده ثقه بالاجهزه الامنيه ويعرف كلش زين يجي اليوم ويغدرون بيه مثل ما غدرو بالكبله ..وهو متأكد كل ريس حكومه بالعراق ميموت موت الله..وبسبب ضربه باليمين والشمال ومخله ولا واحد يوكف يمه ويساعده وصار أبو العريف..

أتذكرت كلام فد مره كاله..زمن الانقلابات ولى..لاتكون يا أبو سراوي حيل ثقه بالامريكان..وأنت تعرف شكد جانو العرابين العرب لازكين بكراسيهم وعلاقتهم بأمريكا..بس جرب شلعوهم بلحظه وجابو غيرهم..أكو مصالح يا أبو سراوي..بيش الكيلو المالكي لو علاوي لو الحكيم..أحنه أنعيش زمن المصالح..وعليه لازم تعرف كل ميكوله أوباما ألجنابك كله جذب..وبعدين لا تشمر فشلك وعدم قدرتك على أدارة العراق بوجود مخابرات دول تعمل ضدك.. هذا عيب على ريس وزراء يحجي هيجي ..أشو صار عشر سنين ماكو مخابرات عاليه التقنيه لو طايح حظها مشتغلت على أرض العراق..مسحو كاعه مسح يا أبو سراوي من جنتو تتسابقون منو أيحصل على لطعه من الكيكه وهم أخذو اللي أيريدوه وشلعو..يا مخابرات يا طويريج..وما طول سياستك هاي المخربطه عمر العراق ميصير براسه خير..والسفينه اللي بيها أكثر من ربان تره الموج أيلاعب بيها وحتما تغرق..اللهم أحفظ العراق والعراقيين..

وما خفي كان أعظم