نهار امس الشوارع غريبة وغير مكتظة والسيطرات خفيفة نوعا ما والسماء تحجب شمسها غيوم فضفاضة والناس يسيرون بصمت وتنظرون بهدوء ويبتلعون كلماتهم كأنهم يترقبون هدفا مستحيل يسجله يونس محمود في مرمى كوريا الشمشونية وطبيعة بغداد لاتشبه ايامها وانا (مثل الاطرش في الزفه ) فرحان بخفة الشوارع عن زحامها وتساهل جنود السيطرات وهدوء سواق السايبات واختفاء زعيق هورنات الكيات حتى دوت ( هلهولة ) ايقظتني من كل سبات وبعدا اشتغل رنين الموبايلات وهلاهل الصاعدات بالكيات وتهانيهن لبعضهن فأصخت السمع وكل ظني ان العراق قدم احتجاجا على الحكم الياباني فأعيدت لعبتنا مع كوريا لكن احدى النساء التي يطلق على من عمرها ( ايجات ) وهن دون ( الحجيات ) صرحت وقالت بصوت جهوري ولو تظهر عليه شحطة وحرارة جكاير الاسبين الاسود ( خاله مبروك مجلس النواب قر الموازنه ) ث مواصلت اتصالاتها من على كرسيها وسط الكيا بكل الحبايب وبعد انتهاء الاتصالات والتهاني والتبريكات تم عقد جلسة مصغرة على مستوى ركاب كيا دون النظر لا للكوتا ولا لنسبة النساء ولاحتى المحاصصة ومن دون ظهور علامات تميز هذا تحالف قوى سنية او ذاك تحالف شيعي وافتتحت الجلسة حجية بالقول ( خاله شنو النا منها الموازنه هي يادوب تكفي رواتب الرئاسات الثلاث والنواب والحبربشيه واليزود منها للحرامية والمقاولات الوهمية والشعب يبقى يتحمى على الشمس ) فأعترضت احدى الايجات وقالت : المهم يقروها ونعبر هاي العقبة السوده اللازكه صار سنتين وعود وراها يصير خير يحجيه واضاف حجي في الزاوية البعيدة بالقول .. هلهلن شكو عليجن رواتب الارامل والمطلقات والرعاية مامشموله بالتقشف ولا بغيرها الظيم علينا فردت عليه الحجيه : خاله على كيفك على كيفك لاتخاف عليهم صدكني راح يطلعونها من خشومنا بمنيتهم علينا ويبوكونها بطوابع واستمارات دعم النازحين وكلاوات غيرها . وهنا تمغط اخر راكب ينام على مقعد الكيا الاخير وخاطب الجميع : والله حرام عليكم همما محصل شغل اليوم وهم خربتو نومتي والله شنو فرحانين بالميزانية يمعودين والله نفس الطاسونفس الحرامية ومادام اكو فقراء واكو حرامية ( الزادت لك والنقص تلك ) ولاتفرحون باقرار موازنتكم وانتظروا يا ما وراها من الطلايب .