فلم الأنبار المدبلج

من تكَعد تفكر بالي ديصير بالأنبار تنصدم , ويصيبك شعور بالخيبة , لأن صار أكثر من تسعة أشهر والوضع نفسة ماكو تقدم للقوات الأمنية شبر واحد بالعكس هجمات لداعش قوية ويومية دا يحاصرون قوة أو معسكر او مدينة ويسقطوهة وهم اصحاب المبادرة دائماً , طيب معقولة هاي القوة الهائلة لداعش لو شنو الفلم , أشو داعش لحد هاي اللحظة منذ دخولهم الي صار الى الموصل وبقية المناطق ما كدروا يوكفون بمعركة وحدة كَدام القوات الأمنية والحشد الشعبي أبداً , والاعلام والمؤامرات هية الي خلتهم يسيطرون على اغلب المناطق الي سيطروا عليها وما نتذكر أبد  أي معركة صارت لمواجهتهم وقت الدخول حتى نشوف قوتهم المصطنعة والمضخمة اعلامياً أكثر من اللازم , والدليل المعارك الي صارت بديالى من العظيم وجلولاء وشمال المقدادية , داعش وكعادتها تستخدم أسلوب التفخيخ والغدر والقنص وبس وما عدهة أي قوة يمكنها مواجهة قوة عسكرية منضمة بل دائماً ينطوها الفرير , وتحررت المناطق بأقل مدة زمنية وأتذكر بالضبط جلولاء والسعدية والقرى التابعة الهة تحررت بأقل من 12 ساعة ,  طيب شنو الي ديصير بالأنبار , ومو على أساس أكو 200 مستشار عسكري امريكي ,و وياهم كافة المعدات والمستلزمات الي تكدر تصفي العراق بيومين , الموضوع منين ما تجيب السالفة منين ما توديهة هي سالفة سياسية , وموضوع مخطط ألة ومدروس لتحقيق غرض معين ما يعرفة بس الي مشارك بيه , وللعلم هناك قوة من العشائر والحشد والجيش وقيادات العمليات موجودة بقاعدة البغدادي وعين الاسد وغيرهة لو انطلقت ساعة الصفر الي طولت هواي , يكدرون ينظفون كل الانبار باقل من اسبوعين , وأذا صدكَت عجوز الأمريكان ودزتلهم فد خمس اباتشيات تلعب بالدواعش لعب وتكَليهم كَلي , الموضوع يا جماعة الخير يفشل وعيب الواحد يحجي بيه والله , الموضوع مصالح السياسيين السفلة تتضارب بالانبار والكثير منهم يوكف موقف الضد دائماً حتى يعرقل أمور التحرير في سبيل يحضر لمرحلة ما بعد التحرير والفليسات الي راح تدخل لجيبة بذاك الوكت , المشكلة أكو شيوخ عشائر من السياسيين كاعدين يتمالخون يومية على عدد المتطوعين الي من طرفهم وشكد راح تدرلهم فلوس وواردات و أصوات في حال لو تحررت مناطق الانبار , الموضوع مو يم داعش الموضوع يم ناس سفلة ماهمهة غير جيوبهة و الناس الي لعب بيهة الدهر طوبة بالمخيمات و بمناطق النزوح , الناس الي أنجفصت وراحت بالرجلين , الهة الله , وحتى الأمريكان السفلة شكد يلعبون بذيلهم وشكد يفرون فرارات لكن مو بكد الفرارات الي يلعبهة ساستنة الاشاوس والخلل هم مو بالساسة الخلل بالناس الي أنتخبتهم أو صعدتهم وخلتهم يصيرون اوادم , أو بالأحرى الخلل بالناس الي كَاعدة ومصفطة وكَاعدة وكل ما حجيت وياهم كَالولك يابة هية مبيوعة , ولكم تالي وياكم يعني شلون هيج وضعكم زين , أصحوا ترة يصيبكم الأضرب مما صابكم , وما أريد أسولفلكم شنوا لأضرب منهة , وألك الله يا عُراق