| يا شوكَ امس.. للشاعر كاظم اسماعيل الكاطع |
....يا شوكَ أمس.... يا شوكَ امس جرح الليالي أبصم ملح داويته يكتاب امس خلصني ليالينه ورق واخر حرف ختميته رديت من درب الوفه وباب الضنون الماصدكَ سديته حاسبت روحي اعله المضه لن ماي وبغربيل عمري اعله الرمل بديته هفتن ليالي محبتي ..ورمادهن طشيته ضيعت تعب اسنين يا تعب السنين ارماد وبهوية هجر ذريته كَلبي الربه ابحضن العشج ينزف ندم رديته حته ضعت لجله وتهت ضيعني من لاكَيته لا يا فشلتي من الكَمر بسمه اشكثر ناجيته عاكَول يطلعلي الورد!! لو ادري ما تنيته كَلبي الشبكَ شوكه وغفه ابصيحت ندم وعيته وافلست من طيف الحضن عيني عمر رديته مات الوفه... وحفريت جرحي بخنجر ودفنيته يا شوكَ امس... شمعة هوانه اتعالج ابأخر نفس شد حيل يا جدم الندم واردس على الجِلوه ردس مات العشج وتحول اسبايه العرس جِذاب يا طير الوفه الغنيته حاسبت روحي اعله المضه لن ماي وبغربيل عمري وعالرمل بديته |
