اليوم بالصدفة شفت أستاذ جاسم المدير مال المعهد اللي تخرجت منه ..
هذا أعرفه يتخشخش وعنده هوايه علاقات بالوزارة ودوائر التربية والحلو بالموضوع الله هاديه عليه وكلش يحبني ويحترمني من أيام ما چنت طالب بالمعهد لحد هذا اليوم وخطيه كل ميشوفني ياكلني أكل بالسلام ..
اني من شفته اليوم رأسا إجتني فكرة ، گلت ليش ما أستغل الفرصة مادام الله هاديه عليه وأگله يتوسطلي يم واحد من معارفه ويشوفلي تعيين منا منا ..
عاد رأسا فاتحته بالموضوع قبل ليفلت من ايدي ، گتله : أستاذ جاسم بلكي تتوسطلي يم معارفك اللي بالوزارة لو بالتربية على تعيين ، ترا ميصير هيچ صارلي سبع سنين أقدم وماأحصل تعيين لأن ماعندي واسطة ، وعود حتى أطمعه ، گتله : ترا لتخاف مو بلاش حتى لو بفلوس هم ميخالف مستعد أدفع ..
هو رأسا گال : شگد تگدر تدفع ؟
اني من گلي هيچ كيفت وگلت بيني وبين نفسي تعينت ورب الكعبة ..
گتله : بكيفك عشرين ، تلاثين ورقة بس كون أتعين ..
هو رأسا طبطب على چتفي وگال : أگلك على فد شي ؟!!
گتله : گول أستاذ !!
گال : عندي تلث بنات ، متخرجات صارلهن سنين ومنين ، ومستعد أدفع على كل وحده بيهن ستين ورقة حتى أحصللهن تعيين وماكو ، ولك عميد ، دخل أعين بناتي المحمضات بالبيت وعود بعدين أعينك يابو عشرين ورقة ..
عاد اني من سمعت هيچ أنكسر خاطري عليه وگتله : عليك الله إذا تحتاج شي من الوزارة گلي ، لان عندي واحد من گرايبي يبيع مي بارد بباب الوزارة شوكت متعطش روحله وگله عماد دزني عليك وهو ينطيك بطل مجرش ..