دمِّرَوْ هذا البَلَدْ عُذَاله وَانْذالَه

سِطَوْ عالعِنَبْ واجمالْته اسْلالَه

****

جيْ خَلَّو القانونِ ابجدَمْ ميزانهْ

إتميل المصالِحْهُمْ كفِّتَه الثكلانة

وابمالِ الحرامِ ابْطون اصبِحَوْ مليانه

وتِرْكَو الهذا الشَعَبْ بسْ عَظْمِ الِفْضالَه

*****

أخِّرَوْ أهْلِ العِلِمْوالمعْرِفه والنوماسْ

اوْ قَدِّمَوْ كلْ جاهلِ اوْ حاقِدِ اوْ دَسّاسْ

لا بالعِيرْ لابالنفيرِ الَه باعِ اوْ ساسْ

لَجَنْ بالفَهْلَوه ايْعَبُّرْ علْ خشومِ اجْمالَه

*****

إلحُكُمْ إلْهُمْ صار رِيّه اوْ مرْبطِ الغايه

حتَه صارِ الوَطَنْ للمصلوخينْ آيه

مِنْ يومْ لِفْطَوْ مِنّه الصايه والصُرْمايه

إيصيحِ الدادْ منهُمْ يَهْلِ الغيره والفالَه

******

ماواحِدْ طِلَعْ منهُمْ بالعِلِمْ معروفْ

جِدّامِ المحَجَّه ايْديرْ وجْهه ايْعوفْ

ماراعه الأراملْ والايْتام اوأهُمْ ترْسِ الشوفْ

أوْ عَدّه اوْفاتْ عنْ مِثْكِلاتِ الوطَنْ واطفالَه

******

مجلِسِ النُوّابْ هالجِبْنا ابكول اوْفِعِلِ

شَدَّةْ وَرِدْ ريحانْ يُصْفه لو كومَةْ زِبِلْ

بالله ارْدَنِشْدَكْ ياشريجِ العكِلْ

شْيِطْلَعْ مِنّه بالمُنْخُلْ لو نِخَلْتَ افْعالَه؟

******

شُوفو الأمَمْ بِزْغارْها واكْبارْ

مجالِسْ نُوّابْها سيفْها البَتّارْ

شكَدْ عظيمِ الوصيْ حيدَرِ الكَرّارْ

مِنْ يومْ كرْسي الحُكُمْ شَبَّهه بانْعالَه

**************

مايِكْدَرِ ايْنامْ مشْغولْ فِكْره جانْ

أبكُلْ يِتيمُ اومخْموصْ وّيْ عبادْته للرحمانْ

إيكولَ اخافَنْ باليَمَنْ طِفْله لو فرِدْ جوعانْ

وِابْشَرْعه قدّمْهُمْ على نفْسه اوْ أهله وِعْيالَه

**************

وينِ انْتو امْنِ الوصي يَهْلِ الصولَجانْ

لوْ جالَه ضيفِ ايْطَفّيْ شمْعَةِ الديوان

أوْ يِعْلِكْ شَمِعْ مِنْ مَوْرِدَه الخالِصْ جانْ

إيْفَرْحِ الضيفِ ابْضُوه الحَقِّ وِاعْدالَه

**************

هَمْ أكو نايِبٍ بالعالَمْ سِرَقْ؟

إلّه لوَنْ عنْ طِريجِ العداله زِلَقْ

مابينِ النزيه اوبينِ الحرامي اهنانه الفَرِقْ

مِثِلْ مابينِ ابْياضِ الوِجِهْ واصْخامِ العَمالَه

***************

قلْعه لِلإرْهابْ دونَ اهلِ الوِفه مجْلِسْنه صُفَه

وِجْهه مايِسْتاهِلْ غيرْ غَمُّ او خُفَه

والخايِنْ شَرَفْ شَعْبه أشْرَفْ لَه لو موتِ اكْرَفَه

حيثِ القَتِلْ أصبَحْ بنْدِ ابْجَدْوَلِ اعْمالَه

**************

مَجْلِسْ هذا لو عِرِسْ واوِيّه؟

ظافرِ اوميسونْ وِجْميلي اوأيادِيّه

أودايِني او مُطْلَك اوعلوانِ اومراميّه

كِلْمَنِ ايْدَمُّرْ بَلَدْنه جلِّبَوْ بِذْيالَه.