بعدين اللي يكول الجيش و الحشد يحاربون وهمه طلعوا يا حبيبي همه مراح يجون يستمتعون بالانتصارات ( العظيمة ) للجيش و الحشد .. راح يبقون هناك وكلنه نعرف انه هوايه بيهم رادوا يتعينون بالجيش و الشرطة وبسبب المحسوبيات ما تعينوا ..

طينتوا عيشتهم بنقدكم وهمه هنا لا تلحكوهم لهناك تخربون حياتهم .. هذا العراق باقي الكم ولوصوا بي براحتكم مثل ماصار 12 سنة تلوصون بالطائفية و الانتقادات مالتكم للرايح و الجاي وواحدكم سبب رئيسي لامراض القلب وتصلب الشرايين مافكر يعدل نفسه .

ثانيا : قضية نشر الاسلام باوربا !!
لتتصورون انو اللي رايح هناك راح حته يكمل نشر الدعوة العلنية ويطب على انجيلا ميركل و يكلهه: اسلمي تسلمي يؤتك الله اجرك مرتين !! لان اللي راح هو فرت روحه من اسلامكم و طائفيتكم وصراعاتكم الغبية واذا تعتقدون انه راح ينتشر الاسلام هناكم فابشركم انتو فقدتوا مسلمين بالالاف بمجرد دخولهم لاوربا لان هناك اما راح يصيرون مسلمين اوادم ومعتدلين (وذوله نادرين ) لو يصيرون ملحدين بسبب الضيم الشافو من وراكم ومن روه اسلامكم .

ثالثا :
اللي ينتقد اللي طلع وغرك و يكول شوداه وحيل بي .. 
اكله والله لوتجيك فرصة لا تروح ركض، هذا طلع وهو يدري بحجم الخطورة بس طلع لان مخليتوله غير حل ..

رابعا :
الشباب اللي طلعو ، لتخلوهم يخربون عليكم حياتكم الجديدة، اعتبروا حجي اللي ينتقدكم من بقايا العراق المزفت اللي طلعتو منه ، روحوا شوفوا وجه الله وعيشو حياتكم ، وطز بالكال و الحجه .

خامسا :
لحد يدخل بتعليق يتفستق بالدين و كال الله وحجه الرسول لان الله شخصيا كالها ( الم تكن ارض الله واسعة ؟) ، يعني هو راح يسالك ليش ما طلعت مو انته جاي صاير متدين وانته اقوال الله ماحافظهه .. بس حافظ اقوال سادتك ومعمميك .

سادسا :
بالنسبة العالية نصيف الخايفة من العنوسة ، طائفيتكم من كتلت الاف الشباب ما خفتي على العوانس ؟!! ولو بقوا كلهم هنا ومحد طلع تره هم محد يكلبج.