يكلك رئيس وزراء اليابان زار العراق وقام بجولة ميدانية، وهو يتجول مر على فقير كلش داكه الفكر بالناصرية انكسر خاطره من شافه كاله من أرجع لليابان راح ادزلك مساعدة.. 
رجع لليابان ودز للعراق 100ورقة أم الاصلع لمكتب رئيس الوزراء حتى يوصلهن للفقير بالطرق الرسمية.. 
لزمهن رئيس الوزراء وحول 80ورقة لوزير حقوق الانسان و20بالجيب
الوزير خله 20 بالجيب و60 دزهن للناصرية
وصلن بيد المحافظ وماقصر خله 20بالجيب و40 لرئيس مجلس المحافظة
رئيس المجلس خله 20 بالجيب و20لرئيس المجلس البلدي
رئيس المجلس البلدي خمط10.. المهم مرت الفلوس عبر سلسلة إدارية إلى أن صفت ورقة وحدة وصلت لمختار المنطقة
مختار المنطقة ما قصر غلسها بعدين راح للفقير دك الباب طلع الفقير كال ها؟ 
المختار كاله:رئيس وزراء اليابان يسلم عليك ويكول الله يطيك

Saif Aldeen Haider