حمايات المسعولين ، ليست بعدد السيارات ، ولكن بالاحترام يا جهلة !

والله صعقت وانا أعد سيارات حماية سليم الجبوري !! اكثر من خمسين سيارة وأكثر من خمسة موتورسيكلات ؟؟ والشارع مفرغ من سيارات المواطنين ؟؟ حقاً يعني من كل عقلك هذا العدد ضروري لحمايتك ؟؟ والله الرئيس أوباما مو هذا العدد حمايه !!! بالله جديات مو عيب ؟؟ وأحدهم يخلي هلكد حماية ، لعد أنتو شكد مكروهين تعرفون نفوسكم !! وشكد مرعوبين لان تعرفون نفسكم محد يحبكم ؟ شنو هلكد حماية تسوي قدر للإنسان السوي ؟؟ لعد موكب العبادي شكد يابه ؟ وموكب رءيس الجمهورية شكد ؟ وموكب عمار الحكيم شكد ؟ ومقتدى شكد ؟ والله عيب عليكم وخزي ! منو أنتو ؟؟ وشدعوة هالخوف ! تدرون ليش ؟ لان ممصدكين أنتو بهيج مراكز ومناصب ، وتخافون تروح منكم ، صدك اللي اختشوا ماتوا !! أدري ، لعد ليش تعيبون على صدام ، وعدي وقصي اذا أنتو بعد انكسين ؟؟
وين لعد ابو الإصلاحات الكارتونية عنكم وعن حماياتكم ؟؟ ميكدر يغير لانه هو أتعس منكم ، اويلي عليكم من عذاب يوم الانتقام ، يابه والله وصلة متبقه منكم ، تدرون ليش ؟ لان هذا سلوكم وهذا خوفكم وايضاً عدم احترامكم لحرمة الشارع وحرية الناس بالتنقل .
قرأت مرة ان بلدية موسكو أبلغت بوتين انزعاج الناس لانه يوقف السير من تمر سيارته وحمايته وعددها سيارتين خلفه ، فأمر الرجل بعدم قطع الطريق امام حركة المواطنين ، وأصبح يسير حاله حال الناس ، فأين أنتم من هؤلاء العظماء ؟؟ قفوا امام المرأة واسألوا أنفسكم هذا السؤال ؟؟ ورحم الله أمرا عرف قدر نفسه .