عندي ولد صديق البارحة أبوه تخربط ونام بالمستشفى ..
اني صح ماأعرف أبوه ولا شايفه بس گلت لخاطر صديقي لازم أروح أزوره بالمستشفى ..
عاد اليوم من الصبح رحت للمستشفى ومن الطريق إشتريت كيلوين موز على كيلوين تفاح وأربع بطاله شربت ، لأن گلت عيب أروحله وأيدي فارغة ..
عاد اني أول ما وصلت للمستشفى دخلت لقسم الباطنية اللي نايم بيها ، گمت أدور بالردهات على صديقي وأبوه وگمت كل ساع أمد راسي بردهة ..
آخر شي مديت راسي بوحده من الردهات وچان أشوف صديقي وواحد من الأطباء واگفين يتناقشون يم السرير مال أبوه وخطية أبوه متمدد على السرير ومعلگيله مغذي ومنتهي فد نوب ..
اني گلت ليش أقطع حديثهم ، خل أسلم بالأول على الحجي أبو صديقي ومن يخلص صديقي كلامة ويه الدكتور عود أسلم عليه ..
رحت على الحجي وسلمت عليه وبسته منا ومنا ومن راسه وخليت العلاليگ على الميز ، بس خليتهن واضحات للعيان كلش ، حتى صديقي رأسا يشوفهن وميگول أجاني أيد وره وأيد گدام ..
عاد اني أول ما خلصت سلام ويه الحجي وشبعته بوس وخليت العلاليگ يمه وچان رأسا أسمع الدكتور يصيح على صديقي ويگله : شذبحتني ، مو ألف مره گتلك خل أخلص فحص لهذا الرجال وأجي أشوف أبوك ، دروح أوگف يم أبوك وهسه أجيكم للردهة مالتكم ..