قبل فترة رحت لاحدى المناطق الشعبية مع صديق و كان قبل العيد السابق، دخلنه محل ملابس و كان عدد من هذولة الشباب موجودين بالمحل يكدرون ملابس عليهم استعدادا للعيد، وطبعا هاي الملابس هي مثل اللي تشوفوهم لابسيهه بالاعياد، انتبهت عله تصرفاتهم و كلامهم، يا اخي هذوله قبل ميكونون معكرين صفو اجواء العيد تره همه ضحية ..

ضحية الطفولة البائسة اللي عاشوها .. بين بيع الخبز اليابس والعتيك ( و الشغل موعيب ).

ضحية المجتمع اللي عاشوا بي، الاب و الام اميين و يعيشون تحت ظروف صعبة لا سنة ولا سنتين ..

ضحية الانعزال عن العالم و عدم وجود قنوات التواصل ويه بقية الناس لانهم منعزلين ببيئة وحدهم، راح تكلي ليش ما يندمجون ويه الاخرين، الجواب : محاولاتهم هاي بالشوارع هي محاولات اندماج مع المحيط .. رغم انها محاولات احنه نشوفهه فاشلة .

محاولة لفت النظر :

احد هؤلاء راجع من شارع الربيعي بعد ان دك وركص هناك يكول الصاحبه : اليوم سقطنه الربيعي ..!
يعني ؟ فرحان لان لفت الانتباه !

الشي الاخر : انه بهاي الملابس يتصور انه يواكب الموضة، منعرف يجوز هو متاثر باحد مثل ما احنه النه ايضا مودلز و ازياء نتاثر بيها ، من وجهة نظره هو الاحلى .

الطبقية النتعامل بيهه مع هذولة لازم تتحول الى محاولة معالجة و انسجام وياهم ، يعني بدل ما انته تسميهم (المان) او ( ‫#‏سياح_اجانب‬) تكدر تعوف هاي التسميات و تحاول تتقرب من واحد بيهم و تسولف وياه .. وراح تشوف كمية الفطارية العنده ..

تره هذوله الشباب نار مال غيرة، بس تحتاجه بشي يفزع وياك، و كلهم شجاعة لحد الجنون و التهور، فخل ننظر الهم بغير منظار .

نقطة نظام : قسم من هؤلاء بهيج مناسبات يكون سكران او ماخذ حبوب هلوسة او يعتدي على الاخرين او يتحرش بالبنات بالشوارع، وهذا يعامل معاملة اي مواطن يعتدي عله الاخرين وعلاجه طبعا القانون، وبقسوة ايضا ..

اني مو بصدد الدفاع عن فئة بقدر ما بصدد مناقشة اعادة تاهيل هؤلاء للاستفادة منهم كمواطنين صالحين، حالة الفقر اللي همه بيهه هي راس المشاكل .. و بالاول و النهاية .. همه مواطنين منه وبينه .

‫#‏عيد_الماني_سعيد‬

Rusly Almaleky