گبل بأيام العيد الناس أول شي يسووه يروحون يعايدون جيرانهم ..
فد مره من چنت صغير بعيد من الأعياد جدي الله يرحمة گلي تعال گودني وديني على بيوت الجوارين خل أعايدهم واحد واحد ..
لان جدي خطية چان أعمى بس أبو واجب ومتعود كل عيد يفتر على الجوارين يعايدهم ..
أني لزمته من أيدة وگمت كل ساع أفوته لبيت من بيوت الجوارين , نگعد شوية ونعايدهم ونطلع نروح لغير بيت ..
أخر شي دخلنه على بيت من البيوت , سلمنه وگعدنه بس چان إستقبال أبو البيت إلنه مو خوش إستقبال ومحترمنه أبد ..
لان جدي من گعد گال : عيدكم مبارك ..
أبو البيت گله .. أدري !! 
جدي گال : أيامكم سعيدة ..
أبو البيت گال : إفتهمنه ..
جدي كلش ضاج گله : بله متستحي على نفسك , أني رجال شايب وبهذا العمر جاي عليك أعايدك وتاليها هيچ تستقبلني?!!
أبو البيت گال لجدي .. وأنت متستحي على نفسك رجال شايب وبهذا عمرك ومن الصبح لهسه معايدني سبع مرات , كل شويه داگ الباب وعيدكم مبارك وأيامكم سعيدة !!
خطية جدي ميدري أني چنت أفرة شويه بالباب وأرجعة لنفس البيت , لان چان عدهم چکليت كلش طيب وكل مانطبلهم ينطوني چكليتة ..
المهم جدي من سمع هيچ رأسا إندار عليه وگال : نعلعلعله عشيرتك على هاي الدگة , ولك شلون تدگ بيه هيچ دگة , وشبعني کتل بالعوچية مالته ..
گتله : التوبة جدو , والله بعد مااسويها والله لان چکليتهم طيب سويت هيچ .. 
گال : ولك أني بتالي عمري هيچ يصير بيه على مود چكليتة , ليش هيچ أبو بطن , وبقى الطريق كله يغلط عليه وواگعلي دگ بالعوچيه .. 
أخر شي گال منو بعد ماعايدناه من الجيران ?
گتله : جدو بقى بس بيت أبو عبود مرحنالهم .. أوديك عليهم ? 
گال : لا خل يولون ..
گتله : ليش جدو ?!!
گال : البارحة حرگت أبو أبوهم عايدتهم تسع مرات وأكلت كيلو كليچة عدهم , بس مناعيل الوالدين بالمره العاشرة طردوني وگالو اذا تجي بعد نكسر رجلك .

طلع جدي مو أبو واجب طلع أبو درب بحجة عيدكم مبارك ومخلصها يگرط كليچة .