تقشف اينما وجهت وجهك تسمع هذه الكلمة فهي تجوب احياء وازقة الفقراء وتمثل الشغل الشاغل للموظفين والمتقاعدين.. لكنها لم تصل لسكان المنطقة الغبراء فعلى سبيل المثال الحجي ابو رحاب صهر السيد القائد (حفظه والله ورعاه) الحجي ابو اسراء طبعا اقام وليمة فخمة لمشعان الجبوري...في ظل الازمة المالية ( الجماعة ممشمولين بالتقشف) المهم بالموضوع.. يبدو الان الالف مليار مازالت تدر ارباحها على قصور القائد واصهاره حسين كامل وربعة.. العفو قصدي ابو رحاب وربعة (شرجعنة لحسين كامل.. اجة عل السيرة اظاهر..ماعرف سيارات ابو رحاب بكد موكب حسين كامل لو اقل لو اكثر لو شنو القصة ؟)

فائض ميزانية 2013 وميزانية الف 2014 وماقبلها صارت بجيوب الجماعة والبلد فلس وهمة جيوبهم مليانة..... كانت الفكرة الاكثر رواجا انو الحجي وربعة صرفوا اموال الميزانيات على الانتخابات الا ان الواقع يثبت عكس ذلك.. صرفوا فلوس الشعب على الانتخابات وظمو ملياراتهم) عموما مشعان يستاهل العزيمة حتى لو تقشف .. يستاهل مشعان لو ميستاهل؟ يستاهل ما دام من ربع الحجي والله يديم الاخوة والمحبة ويثخن لبنهم كولو امين.

نرجع لحمدية خانم.. الاخت حمدية الجاف( ابنهة شوان ممقصر مبدع ما شاء الله عليه حفلات وسهرات بجال الوالدة) القروض بدون ضمانات وتمويل الصفقات الوهمية ومليارات موثقة بالأدلة ومؤتمرات ومتابعات لتسليط الضوء على نهب حمدية الجاف لأموال الشعب العراقي ( وثاني يوم طلعت تمشي ورى العلاق) تأكيدا منه ومنها على انها في حماية الحجي وجماعته ( فمن دخل حصن الحجي فهو امن) العلاق مدير البنك المركزي الذي حل بدلا من الشبيبي استلم زمام الامور في البنك المركزي والوضع تحت السيطرة ( يرتبهة من يمة بعد لمن تجي الانتخابات ميقصر خوش رجال ) المهم مليارات الجاف كانت كفيلة بتضخيم ثروتها وشراء عقارات ومولات في اربيل ودهوك ..وبالمقابل تمول حملة انتخابات الحجي (نص الهة ونص الة).. ماكو تقشف مو ياجماعة الخير ..اصلا منين يجي التقشف حمدية نزيهة وابو رحاب فقير حال متقشف.. وخير ان شاء الله , هسه تجي الانتخابات ويفوزون نفس الوجوه المتقشفة تصعد شلون ..قوطيتين ببسي وكيلو تمن وتفض السالفة!