| جسور شط العرب... دراما ساخرة |
الابطال : ابو جاسم وابو طالب المكان: البصرة – التنومة (مركز قضاء شط العرب) الوقت : الساعة السابعة صباحا ابوطالب: السلام عليكم ابو جاسم ابوجاسم: وعليكم السلام , هله خويه : صبحك الله بالخير ابوطالب : صبحك الله بالخير , هاا خويه شعدك اليوم من الصبح طالع ابوجاسم: والله رايح على الشط بكردلان يكولون جاي يشتغلون بالجسور ويريدون عمال.. بلكي احصلي شغله وياهم , عماله , حارس , شنهي الجان , حيه الله. ابوطالب:توكل على الله خويه , راشده بعد 3 ساعات رجع ابو جاسم ويدردم .. والله ما يصير .. ذولي ما يستحون.. سرسرية.. ما يخافون الله ... شراح يصير بينه ابو طالب كاعد بعتبة الباب ويدخن بجكارته ويشرب استكان جاي: ها ابو جاسم شو رجعت , يبين ما حصلت شي ابو جاسم: لا والله اكو شغل بس انا ما اشتغل هيج شغل .. انا ما اجذب على روحي .. ما اجذب على الوادم.. انا ما اوكل اهلي حرام. ابو طالب : خير شصاير , شبيك, تعال اكعد يمي واشرب جاي وسولفلي شبيك. ابوجاسم: خويه ذولي جاي يسوون بالجسور مال كردلان .. وحصلت شغل وياهم.. شغلوني عماله ابو طالب : اي خوش خبر هذا .. جا ليش رجعت؟ ابوجاسم: شو هذوله جاي يصبون بالدنك مال الجسر .. والخبطة مالتهم على الكاع .. ونصها تراب وزبالة.. وينكلون الخبطة بالتنك.. انا كتلهم عمي هاي ما تصير .. هذا جسر .. مو مرافق حته تصبونه بتنك.. وهاي الوادم وسياراته كله تعبر منا على الجسر .. بويه هذا الجسر يطيح على هاي الحسبة .. اول سيارة تعبر عليه يطيح.. هسه على الاقل جيبولنه خباطة تخبط .. ليش بيدينه. ابوطالب: شني هاي ابو جاسم تحجي صدك. ابو جاسم: وروح ابوي مثل ما اكلك ابوطالب: اي وشسويت بعدين .. شكلولك. ابوجاسم: كلولي اذا ما عاجبك بططل.. انا هم كتلهم عمي انا مبطل .. وراح اشتكي عليكم. ابوطالب: لاحول الله.. صدك جذب. ابوجاسم:انا هم ما كلت باطل رحت للمهندس وكتله السالفة كيت وكيت.. كلي عمي انت شلك غرض ..تريد تشتغل اهلا وسهلا .. ما تريد تشتغل اكو الف واحد غيرك.. كتله عمي الشرهه موو عليك .. علي انا اجيتك وكتلك..عمي انا راح اشتكي عليكم عد المسؤولين...كلي روح اشتكي وين ما تريد تروح روح. ابوطالب: وعدمن تشتكي بعد ابو جاسم ابوجاسم: خويه وانا راجع ..اجت سيارات وشرطة وكفوا يم الجسر.. سألت واحد منهم عمي شني صاير ..منو هذا الي اجه..كلولي هذا مسؤول جبير بالمحافظة جاي يشوف الجسر.. كلت اي ولك الله جابه ..خلي اروح اشتكي عنده واكله ذولي السرسرية شجاي يسوون. ابوطالب: اي ..وخلوك توصل يمه وتشتكي. ابوجاسم:خويه وصلت يمه .. ولو مارايح يمه احسن. ابوطالب: هاا ليش؟ ابوجاسم: شو خويه هذا طلع اخس منهم .. سولفتله الشغله كلهه.. شو هذا يباوعلي بنص عين ..ودار وجهه عني وما حجه وياي ولا حجايه.. رد علي واحد وياه لابس غاط وباينباغ..كلي انت شلك غرض ..يصبون بتنكة يصبون بقندره ..انت شكو ..انت تفتهم احسن منهم..روح منا عمي روح ..خلينه نشتغل. ابوطالب:ههههههه , ايا سيبندي .. هذا هيج كلك... خويه هاي شغلة ما ينسكت عليهه ابوجاسم: اي والله ما ينسكت عليهه.. انا ما حارك دمي الا هذا شلون يدور وجهه عني .. وهذا السيبندي شلون يحجي وياي..اخ اخ ابوطالب: اشرب جايك ابو جاسم .. هسه نروح انا وياك للقايمقام ونشتكي.. يكولون شويه ابن اوادم وكويويج ابوجاسم: خويه خاف يطلع مثلهم..وهم ما يسوي شي. ابوطالب: لا لا خلي نروح ونشوف, احنه شخسرانين,, توكل على الله ,, يله يله راحوا للقايمقامية .. كللولهم القايمقام ما موجود .. تعالو بعد اسبوع يجوز تلكونه.. رجعوا ابو جاسم وابو طالب وهم يدردمون .. راح يموتونه ذوله ,, سرسرية ,, ما تصيرلهم جاره |
