البعض من سياسيي أخر وكت.. أيفضل أن يبقى الشعب ميعرف كلشي.. ويظل دايخ ويفر بذانه.. ومن أيريد يعرف شي أيخلوه يصطدم بكونكريته كلش قويه.. لو يتهم بالارهاب ..فيكول أني شعليه..وهذا ما أيريده السياسي بالضبط.. هوايه من العراقيين أيعرفون تفاصيل صفقات الاسلحه الروسيه والاوكرانيه والتشكيه.. ويعرفون أكو وفد فني عسكري هو اللي عقد الصفقات بس أكو وفد رسمي هو اللي وقع .. ويعرفون أن علي الدباغ والشابندر والتاجر اللبناني همه المتهمين الاساسيين بجميع صفقات الاسلحه.. وشلون توزعت العمولات وبالدولار على أعضاء الوفد الفني الاول ومن وراها حصل المترجم على مبلغ ميحلم بيه وأنطاها اللهيب..

ويعرف اللاعبين الاساسيين اللي ضربو الاقتصاد العراقي في التحويلات المرعبه للبنك المركزي واللي تقدر بأثنين مليار و300 مليون دولار.. ويعرف منو الجهات اللي تعبر السيطرات وهيه تحمل العبوات والاسلحه حتى تسلمها للارهابيين.. تره يا جماعه أحنه مو غشمه ونايمين بالعسل.. الملفات كلش هوايه.. وهم المشتركين بيها هوايه..

مليارات العراقيين ضاعت بين الحجي والسيد وأبن العلويه وأبن الشيخ.. الحجي من دولة القانون عنده أدله منو لعب بفواتير البنك المركزي وشلون صار التحويل ومنو الجهات المستفيده من جعل قيمه الدينار العراقي في تدهور مستمر.. ( وبالمناسبه كل الاسماء ينتمون الى المذهب الشيعي )..والسيد أبو عمامه من التيار الصدري عنده أسماء المتورطين الاساسيين في صفقات الاسلحه وتره مو بس الدباغ والبدري والعبيدي والقطان وأكو أسماء بالبرلمان وضباط برتب عاليه..( وهم كلهم شيعه ) .. وأبن الشيخ يعرف منو ينقل ويسهل ويوزع ويدفع حتى أتصير أنفجارات.. ومنو بالجوامع ضام الرشاشات والقنابل اليدويه ( وذوله من العرب السنه)..الشعب العراقي ضايع بين ذوله الافات الخطيرة.. لا الحجي راح يكشف منو دمر الاقتصاد العراقي, ولا السيد أبو عمامه يعلن اللي أخذو عمولات حتى قبل توقيع الاتفاقيات, ولا أبن الشيخ أيكول منو هاي الجهات اللي تسفك وتحلل الدم العراقي..

نوري المالكي أتورط من كال سأقلب الدنيا أذا ذهبت للبرلمان.. وبالناصريه وصف المتظاهرين في ساحات الاعتصام بالمتمردين والمتأمرين .. ليش ميروح للبرلمان ويكشف النواب اللي عدهم أرتباطات وثيقه ويه القاعده وكدام الشعب.. ومراح أيروح وميروح .. الدالغه المالكيه أدكول ذوله البرلمانيين عدهم حصانه.. بس بشرفكم  أسمعو هاي الفيكه.. هذوله البرلمانيين الستة عشر عليهم أوامر قبض صادره من القضاء.. ورئيس البرلمان ميرفع عنهم الحصانه.. شوفو ألضحك على ذقون الشعب والمسخره .. لو المالكي أيريد أوامر القبض تمشي وتاخذ مجراها الطبيعي.. ليش يوكف رئيس البرلمان بوجهه.. المالكي يعرف منو اللي أيفجر ومنو ينقل بسياراته الاسلحه بس ميكدر يحجي وميصير يحجي.. هذا أتفاق..مو كوتره.. والمالكي ميخاف على الشعب بقدر ميخاف على كرسيه..

وسأقلب الدنيا جانت أنتخابيه سياسيه..ميقصد بيها الحقيقه.. لان الطرف الاخر عنده شغلات أقوى على المالكي.. أحنه نعيش مؤامره جبيره مشترك بيها المالكي والجعفري والحكيم وعلاوي والصدر والنجيفي والحزب الاسلامي وكل العناوين التافهه اللي سببت وراح تسبب الدمار عدما يسقط بشار الاسد وراح تشوفون..

وما خفي كان أعظم