يابه بعد ما انسحبت الجكسارات من المنطقة الخضراء وسيد مقتدى عاف الاكو والماكو وشلع وبيب بيب ومالحك يلبس المداس يكولون عافها تك وتك لان شافوا واحد من الجنود شايل الفردة الثانية محتفظ بيها ذكرى وظلت الدواشك والمخاد والملابس الخارجية والداخلية وصارت فرهود واقبض من دبش لا شلع ولا قلع والناس فوكاها عافت ابو خيمة الزركة وكامت تنادي وتدعي يا بو خيمة الخضرة بلكي يخلصنا من المفسدين وشلع قلع وحكومة تكنوقراط وتاليها انشلعت الخيمة وما انشلعوا جماعة الخضراء , وكبل طار السيد لبنان بطيارة ال سعود وجمعوا الفرقاء مقتدى والمالكي وجانت ليلة عتاب وسهر وعناق وسمر وعين الحمرة انطوها لمقتدى ليش تتحرك بدون علمنا طلع( اخي مقتدى ) على كولة ابو الثائر مقتدى مجطل وي ال سعود وي اهل العكل وي السفير السبهان والله وسفة على العكل يضحك عليها مقتدى على اساس مصلح جديد يابه لعد منو لحرق بغداد وفلش جوامع السنة ومليشياته قتلت الالاف ودفنوهم احياء وره السدة بمدينة الصدر صدك لو كالو السياسة ما الها دين, المهم يطب ابو سعود من حصان طروادة مقتدى من سفارته ابغداد وبوساطة سليم الجبوري ابو براطم .. واني اكول كلها باكت هوى من خيمة مقتدى ايامها !! بس ابو شفة كل ساع مصرح ( من حقهم التيار يظاهرون من حقهم) شنو الدالغة تاليها بينت كشفها سليماني ودز على مقتدى وجان مغتاض كلش اشلون تتحالف وي ال سعود منو ورطك كاله والله ورطني رئيس البرطمان العفو اقصد رئيس البرلمان ابو براطم كاله سليماني اني اعلمه ابو شفة وجمع سليماني جماعته بالبرلمان وخصوصا جماعة المالكي وصار الاعتصام مال البرلمان اني اول مرة اشوف برلمان يعتصم على نفسه يطالب بمحاسبة المفسدين اللي هم نفسهم اكو واحد يحاسب نفسه, بس واحد سامع يكولون بالجيش مال كبل الضابط بساحة العرضات وكعت العصا من ايده ضاج حيل اشلون وكعت العصا من ايده وقرر يعاقب نفسه 3 ايام سجن وزيان صفر مع وقف التنفيذ هسه الظاهر جماعة البرلمان رادوا يعاقبون نفسهم المهم سجنوا نفسهم بالبرلمان واكل وشرب درجة اولى بس ما زينوا صفر , طلع المقصود سليم ابو شفة وطالبوا باقالته وطبت امريكا بالنص وجمعت الاخوة الاعداء وكالتهم على كولة ( زكي رستم ) - كلكم اولادي , كلكم اولادي - هذا مقتدى اشلون شفج خلاكم تتناطحون بيناتكم ورضتهم كل واحد انطته اشوية من الكعكة المهم تراضوا بس اتفقوا يرجعون الاعتصام امام الخضراء مال مقتدى حتى تضغط الجماهير!! جماهير اخر وكت بالتصويت على حكومة التكنوقراط حتى تكمل الرواية وفصول المسرحية زين مو امس جماعة مقتدى كالوا البرلمان والحكومة وسليم كلهم نعتبرهم ميتين و ابد مانتراجع لان السيد الغايد كال كلمته شلع قلع اشو ثاني يوم حاكم الزاملي قاد سباع السيد وثبتوا سليم والعبادي وين الحجي مال امس لو كلام الليل يمحوه النهار مو هم موته حسب قولك وسبحان من يحي العظام وهي رميم وبعدين طلعوا بس خمس وزراء مساكين بدلوهم والحيتان بقت بمكانها لعد وين يا سيد مقتدى خطاباتك وبياناتك والزباد والتفال والسلاج اللي يطلع من حلكك وشلع قلع واحنا ما ننبلع اشو طلعتوا فاشوشي انوب ثبتوا المفسدين وولد السيد وسباعه ويانه اليوم الساعة .. والحرامية والمفسدين صارلهم خوش ظهر وبعد مايخافون لو يجي القبيس لان الجماهير ويانه, وامريكا راضية عن تحركات مقتدى وعن اعتصاماته وهاي هي المقاومة والممانعة وهاي هي و شلع قلع..