أحنه وين رايحين وبيا طريق ماشين..منو الصدك ومنو الجذب.. أشو عايشين بضباب وبجو مغبر وترابي.. ويوميه مصيبه عدنه .. جاه شوكت نبني العراق أذا الجماعه كاضيها بس لغف وأزمات ومجازر ..من بابه أحنه لازم أنشرع قانون بتجريم البعث والبعث بمكتب القايد العام وبوزارة الداخليه ومليانه وزارة الدفاع وبرتب عاليه وبيدها أرواحنه.. أنريد نعرف ليش دولة القانون أتصر على هذا الشي وهي تعرف أن المالكي هو من أستثنى العساكر البعثيه المجتثه ورجعهم للداخليه والدفاع وليش منح فدائي صدام رواتب تقاعديه وبيوم تأسيس البعث ..هاي مو شغله مرتبه وصارت من تحت الطاولات ..أنسوي مجزره ونكول القاعده وأفلام النظام السابق همه السبب وبعد يوم أنكول اللي كتلناهم ينحسبون من الشهداء وألهم الحق بالتعويض.. ونشوف الجلاد يفتر بشوارع بغداد ويركب أفضل السيارات ويدخل أحسن المطاعم ومن أيفوت بالسيطرات ياخذوله تحيه ونشوف الضحيه بزنزانات نوري المالكي واللي أنعدم طبه مرض والبقى عايش ينتظر فرج الشهرستاني .. أيسون مجازر وأعتقالات وأعدامات حتى أيغطون على ألالاف من شغلات اللغف .. ماكو عاقل بالعراق أيريد المالكي وزمرته أيرجعون للحكم ومن أنشوف صناديق الاقتراع أيطلعون همه الفايزين شلون صار هذا محد يدري بس الراسخون في حمل هاي الصناديق وأوراق الاقتراع اللي توزعت حتى كبل ليله من الانتخابات ..هم هاي شلون .. شنو أكو أشباح أتحرك هذا البلد اللي فد يوم راح ينفجر ونشوف أبو تحسين لازم نعاله ويضرب نفسه ويكول أني سويت عاباني زماني.. نعقد صفقات مشبوهه وتضيع مليارات الدولارات بجيوب الرفاق الجدد ولمن يوصل التحقيق للنهايه يأمر القايد العام بغلق القضيه.. نشتري أجهزة الكشف عن الزاهي بملايين الدولارات بعد فتره يوكع بيها شخص واحد ويداري على جماعته وتتموع القضيه وتنسي وذاك جهاد الجابري كاعد بغرفه خمس أنجوم ولا بالاحلام. وعبد العزيز البدري وعزة الشابندر وزياد القطان وعبد القادر العبيدي وأخرين متهمين وراكبتهم قضية أختلاس بملايين الدولارات بصفقات السلاح الروسيه والاوكرانيه والتشكيه, بعدين تباوع تلكيهم مشتركين بالانتخابات والادهى أحزابهم تفوز بالانتخابات.. وين الصدك وهم وين الجذب.. أحنه غلط وراكبنه الجذب ومثل العكرب دواها بس النعال..لو الخوف والظلم والاضطهاد عشعش بأجسادنه وعقولنه ورضينه بالمقسوم وهاي هيه.. أنكول أحنه ضد الطائفيه وضد كل من أيحاول بثها بين العراقيين بس لمن نرتقي المنصه وكدام جمهور الناصريه والديوانيه أنحرض على الطائفيه ونوصف المتظاهرين بعبارات دونيه متليق بريس وزراء .. بس الجذب حبله كصير ولازم تنكشف الحقيقه..

نعدم صدام حسين لانه دكتاتور وسوى مجزره الدجيل وظلم الشعب العراقي وصاحب المكابر الجماعيه.. ونباوع نوري المالكي يصرف مثله وصار مستبد ومجرم حرب وصاحب مجازر الفلوجه والحويجه ومكابر وادي السلام والكرخ مليانه بناس تلكيها بجسد بدون راس لو بس أسم لان أجسادهم ضايعه بالمزابل وبالانهار.. بزمن صدام روح كلشي سوي بس لا تتحرش بالكرسي.. اليوم أنشوف المالكي عنده نفس طموح صدام روح بوك وروح كلشي سوي بس لا تحجي على الحجي ولا تتحارش بكرسي المالكي.. جاه أحنه شسوينه.. غيرنه بس الاسم وبقى عقل صدام هو اللي يحكم هذا البلد..معقوله أمريكا تجي بجيوشها وتضحي أبشرها علمود بس أتغير أسم صدام حسين بنوري المالكي..

وما خفي كان أعظم