أيكتلون المحروك لشته ويمشون بجنازته ويدفعون فلوس الجادر والكهوه بس الكراسي على المحروك لشته.. أيحذرون من الفتنه وهمه أيبثون سمومها بين الشعب وصارت علنيه وماكو خوف.. يفتون أن البوك وأخذ فلوس حرام تره الله أيذبه بالنار وهمه لغفو مال الله وعباده وطلع كل بره بجنط  تخبل لان بالداخل مو أمان .. كلنالكم من زمان تره لازم تسون مناقصه لشغل رئيس للجمهوريه لان مام جلال بعد ست أشهر كام أيكول (أينز) بالالماني يعني (يك) وينتظر دوره ثالثه حتى أيكول وره وره يعني تعال صفكوله للشاطر.. يابه تره البرلمان ماكو داعي وجوده لان الربع والجماعه كضوها ضحك وقشمره وجاي وكهوه بالكافتيريا , ونواب ونائبات ما عدهم وكت يجون للجلسات, لان صارو مقاولين وطكو فوك.. وهسه البرلمان بس بالاسم وكاعد يتفسخ وتطلع جيفته شويه شويه وكلمن أيكول هذا البرلمان راح أيسوي معجزه أني أكولكم.. كولو زيزي!!.

يا جماعه المشهد العراقي كلش صعب ومخربط وصايره بالنعل وكلها عنتر وعبله ضاعت بين الرجلين.. الجماعه ملتهين بنتائج الانتخابات وأبو سراوي أيريد أيسوي تحالفات بعد ما شاف ماكو فايده من الاغلبيه ويوميه عزيمه أبيت أرعن والجماعات المسلحه سيطرت على مدن ونواحي بغرب العراق ولعبت جوله بالناس ورفعت أعلام على البنايات أيشي سوده وأيشي خضره وبيها نجوم ومن غير نجوم.. واللي كتلو جنود الاستخبارات الابرياء بالرمادي همه من هاي الجماعات اللي أتريد أتسوي بلبله بوضع الانبار حتى المالكي يضرب المعتصمين وتصير فرصه للقاعده والجماعات المسلحه أن تحصل على موطئ قدم في صحراء الرمادي أتسويها خلفيات للمجاهدين اللي أيحاربون بسوريا..

هو مجرد أقتراح لحكومة نوري المالكي.. أيريد يأخذ بيه أو أيريد أيشمره بالزباله .. ليش ما أتسون حكومه تصريف أعمال لحين موعد الانتخابات التشريعيه يرأسها أحمد الجلبي اللي هو من التحالف الوطني ومقبول من جميع الاحزاب وحتى من المرجعيه.. ويصير باقر الزبيدي وزير الداخليه لان هذا الرجل صارت عنده خبره بهذا المجال وهو يعرف شلون أينظف هاي الوزاره من المنتفعين والاغبياء وهوايه ضباط ومراتب أيحبون طريقة عمله.. ويصير سلطان هاشم وزير الدفاع لان مراح تلكون وزير وطني مهني يؤمن بوحدة العراق مثل هذا الاسد، وعنده علاقات واسعه مع ضباط ومراتب، وهذا العسكري الشريف عنده قدره وخبره في أدارة ملف الدفاع..

لان أذا بقى نوري المالكي بالحكم وبهذا الاداء الفاشل والمخزي..جاه راح أنكول كش بلد.. ولا المالكي أيحط أيده بيد علاوي ولا الصدر مقتنع بسياسة المالكي وراح يبقى البرزاني ينتظر شوكت يوكع المالكي حتى أيوقع على المادة 140 .. ومن أجل هاي الاوضاع المؤلمه والحزينه اللي أيمر بيها العراقيون  صارت مشاورات بالجامعه العربيه حتى أيصير عدنه مندوب عربي دولي يعنى بالازمة العراقيه مثل الاخضر الابراهيمي بسوريا, وهذا أن دل على شي أنما يدل على أن مشكلات العراق لا حل داخلي لها وبعد أن عجز مارتن كوبلر المبعوث الاممي من أداء وظيفته بتقريب وجهات نظر المتصارعين وكل واحد يشمر أخطاءه على غيره ووصلت بالعراقيين الى الرجوع شئنا أم أبينا الى شنو مذهبك وأنت منين وهاي هيه النهايه..فسارعت الجامعه العربيه لابداء المساعده اللي مراح يرضى بيها المالكي وراح يطلع بخطبه أيكول بيها هاي مشكله داخليه وما نسمح بتدخل خارجي وأدعو الى طاوله للحوار لكل الاحزاب والكتل اللي تؤمن بالديمقراطيييييييييييييييه..
وما خفي كان أعظم