كبل فتره مو قليله.. الرفيق بايدن كلف مستشاريه بوضع الدراسات والبحوث بأيجاد صيغه لتقسيم العراق كبل ما أيدش عمنه أوباما الى سوريا لانهاء نظام الاسد وبلا رجعه.. وشافو العباقره اللي يختلفون من السما للكاع عن مستشاري المالكي اللغافه, أن العراق شلون ميصير لازم يتقسم الى منطقه شيعيه بالوسط والجنوب وأخرى سنيه من الانبار ونينوى وصلاح الدين وديالى وأخرى الكورديه والتي هي بالاساس موجوده بس أكو أختلاف على المناطق المتنازع عليها وهاي محلوله بأرجاعها الى الكورد حسب تقسيم بايدن.. الغايه من هذا التقسيم.. راح أتصير دوله نفطيه كبرى تحت الوصايا الامريكيه وتمتد من العماره والبصره بأتجاه الكويت وخليج عدن الى قطر..وهاي موجوده بخارطه في أحد معاهد البحوث الامريكيه ومؤشره بالاحمر ومكتوب عليها الدوله النفطيه..
سياسيينه الفلته اللي قادو البلد..يمشون وفق ما تم رسمه في البنتاغون ووزارة الخارجيه الامريكيه أيام المعارضه اللي راحت ما ردت, وبتواقيع كل الزعماء اللي اليوم وصل هذا العراق بجالهم الى ما راده مشروع بايدن بالضبط.. بس بشرط بقاء نوري المالكي على رأس السلطه في العراق.. وطبعا أيران خامنئي تعرف التفاصيل أحسن وأفضل من كل سياسي عراقي وهذا متوافق تماما مع ما تريده الولايات المتحده.. وخدعة أسرائيل بضرب أيران يجي مكمل لسيناريو تقسيم العراق.. وللعلم متكدر أمريكا أن تقسم العراق ألا بعد أن أخذت موافقه أيران..وهاي هي أصول اللاعبين الكبار.. وهذا مو تحليل لكاتب ضد الحكومه أو ويه الحكومه أو تقسيط لشخص لحزب لا أبدا بس هذا واقع أجه من متغيرات العراق السياسي والاجتماعي والاقتصادي وما يدور بمنطقتنه والعالم..
وكبل أيام جان وفد كوردي كلش رفيع بزياره للولايات المتحده.. وبيها كطع بس محافظ كركوك زيارته على أحداث مجزرة الحويجه..بس الامور وصلتنه تبشر بخير.. شكو أتفاقات موقعه بين الجانب الشيعي ويه الكورد راح تتنفذ بس تبقى كركوك قيد الحوارات والطاولات .. وعلى كولة نجيرفان..أريد زوج ومن ظهر أبوه مينفذ هاي الاتفاقات..يا جماعه مو بكيف المالكي أو الجعفري..هاي سياسه وعلى الجميع تنفيذ الاوامر لمنظمات كلش جبيره أكبر حتى من أمريكا وهي تكود الشعوب الحقيره.. بلد بعده تحت الاحتلال وحسب البند السابع.. يعني أذا تريد أمريكا باجر ترجع بثقلها للعراق ترجع وأتحدى قوات سوات والفرقه القذره توكف بوجه جندي أسود مجند مو أبيض مارينز , ينصب خيمه بساحة الاعتصام وغصبن على كنبر وغيدان ياخذوله تحيه.. وشفناهم شلون أيدون تحيه عسكريه مضبوطه لسرجنت يعني عريف مارينز ..هذا الشغل جاه شلون..
كلشي بالعراق موضوعله برنامج أمريكي محدد.. موعد الانتخابات المحليه والتشريعيه بالتواريخ.. عقود صفقات التسليح.. أتحدى فطحل من الحكومه أو البرلمان أيروح يعقد صفقه مو بعلم أمريكا.. أخذوني على كد عقلي..العراق وهاي الفلوس اللي عنده ميكدر يشتري محطات كهربائيه جديده ويوزعها على المحافظات..أكو شركات عالميه خلال ست أشهر تنصبها وتشغلها ويه صيانتها.. تكدر لو لا .. وحتى محطات المي ..تعالو شوفو الكويت وقطر هاي الاماره الصغيرونه أيشربون مي حلو عسل.. جاه أحنه ليش نضرط أعوج ..يعني همه أيريدونه نبقى بهذا الضيم..زين ليش..أحنه شمسوين..شنو السبب.. شوفو شلون صار العراق طريق مرور وترويج للمخدرات وحبوب الهلوسه وتعالو شوفو شلون طايح حظ  شبابنه اللي كاعد بالكهاوي عطاله بطاله ويستغلوهم بهاي القذاره.. ولا تصورون المالكي أيقوم بعمل أرهابي ضد العراقيين سنه أو شيعه أذا مو أكو موافقه أيرانيه وأمريكيه كبل كلشي.. 
أنا غلام أبوي ..يعني أحنه ماشين برجلينه لتقسيم العراق.. ولكم تقشمرنه ونضحك على شواربنه هاي أذا بقى شارب بالعراق ..بس هذا التقسيم أيفيد بلدنه وشعبنه وشلون رايح أيصير شكله..هو أحسن لو الطائفيه أفضل من التقسيم.. فدرالي كونفدرالي كله طيحان حظ .. شنو صلاحيات المركز..أكو أسئله هوايه لازم تنطرح على العراقيين كبل كلشي.. وهذا دور الحقوقيين ورجال القانون والاعلام والسياسه والنخب المثقفه والواعيه..لان أكو دول عالميه تتبع هذا التقسيم بس ياهو اللي يرهم على مجتمعنه اللي أيفيد شعبنه.. والعاقبه للمتقين..
وما خفي كان أعظم